Sanıtarlyq normalardy saqtamaǵan nysandar karantın bitkenshe jabylady – SQO ákimi
PETROPAVL. QazAqparat – Sanıtarlyq talaptardy saqtamaǵan nysandar sottyń sheshimimen karantın bitkenshe jabylady. Bul týraly Soltústik Qazaqstan oblysynyń ákimi Qumar Aqsaqalov onlaın brıfıngte málim etti, dep habarlaıdy QazAqparat tilshisi.
SQO-da osy kúnge deıin koronavırýs ınfektsııasy 49 adamda anyqtaldy, olardyń 33-i emdelip shyqty.
Qumar Aqsaqalovtyń pikirinshe, basqa oblystarmen salystyrǵanda COVID-19 óńirde az tirkelýiniń basty sebebi - qatań karantın sharalarynyń engizilýi men turǵyndardyń tártipti qatań saqtaýy. Alaıda búginde arqany keńge salyp, sanıtarlyq normalardy saqtamaıtyndar da bar eken.
«Talap bárine birdeı. Mamandar cońǵy eki aptada 2 myńnan asa nysandy tekserdi. Nátıjesinde 227 kemshilik anyqtaldy. Keıbir dámhanalar, dúkender men shashtarazdar talapty oryndamaı otyr. Mysalǵa, «Tsentr plova» dámhanasy, «Dana» shashtarazy jáne «Motomır», «Mars», «Saltanat» syndy dúkenderde qyzmetkerler men kelýshiler maska taqpaıdy, satýshylar qolǵap kımeıdi, belgiler jasalmaǵan. Eger de bul kemshilikter túzelmese, sottyń sheshimimen atalmysh nysandar karantın bitkenshe jabylady», - dedi óńir basshysy.
Qazir oblysta kınoteatrlar, túngi klýbtar, oıyn-saýyq ortalyǵyndaǵy fýd-kort pen balalar alańy, kalıan men kompıýter klýbtary jabyq. Oblys ákimi qyzmet kórsetý salasynyń jumysshylaryn ýaqytsha jaǵdaıǵa túsinistikpen qaraýǵa shaqyrdy. Juqpaly indet kez kelgen ýaqytta órship ketýi múmkin. Oblystyń shekarasy jabyq bolǵanymen, kún saıyn shekara arqyly 350 adamǵa deıin ótedi eken.
«Bizdiń oblyspen kórshi eldiń aımaqtarynda jaǵdaı turaqty emes. Reseı - naýqastardyń sany boıynsha álemde úshinshi orynda. Qazir shekaradan bizdiń azamattar: stýdentter men vahtalyq ádispen jumys istegen jumysshylar ótip jatyr. Olardyń barlyǵy test tapsyrady. Shekarany jaıaý ótken azamattar karantındik statsıonarǵa jatqyzylady. Búginde oblys boıynsha kúnine 1 myńǵa jýyq test jasalady. Bunyń barlyǵy oblysta vırýstyń taralmaýyna septigin tıgizedi», - dedi Qumar Aqsaqalov.
Sóz sońynda SQO ákimi turǵyndardy qaýipsizdik sharalaryn saqtaýǵa shaqyrdy. Onyń aıtýynsha, jaǵdaı qıyndaıtyn bolsa, karantın rejımin kúsheıtýge týra keledi. Shekteý sharalaryn engizbes úshin qazirgi ýaqytta turǵyndardan asqan jaýapkershilik pen túsinistik kerek.
