Sanıtarlyq normalardy buzǵan Tarazdaǵy aýrýhananyń bas dárigeri jumysynan ketti
TARAZ. QazAqparat - Tarazdaǵy oblystyq balalarǵa arnalǵan juqpaly aýrýlar aýrýhanasyndaǵy patsıentterdiń jaǵdaıymen Jambyl oblysy ákiminiń orynbasary Erkebulan Daýylbaev tanysty, dep habarlaıdy «QazAqparat» HAA-niń tilshisi.
Ondaǵy jaǵdaı talapqa saı emes. Sondaı-aq tekserý barysynda taǵy sanıtarlyq normalardyń buzylý jaǵdaılary anyqtaldy.
Aıtalyq protsedýralyq kabınet bólmeni tazalaýǵa arnalǵan quraldar turatyn orynǵa aınalǵan. Patsıentterden alynǵan qan synamalarymen jumystar ýaqytynda júrgizilmegen. Buǵan qosa, tekserý barysynda azyq-túlikti jáne dári-dármekterdiń ydystaryn saqtaý normalarynyń da buzylǵandyǵy belgili boldy. Sondaı-aq bólmelerdi taraqandar basyp ketken.
Osynyń barlyǵyn muqııat zerdelep shyqqan oblys ákiminiń orynbasary anyqtalǵan faktilerdiń mundaı medıtsınalyq mekemede saý adamnyń óziniń aýrý juqtyryp alýy múmkin ekendigin atap ótti.
Oblystyq densaýlyq saqtaý basqarmasy basshysynyń orynbasary Hamıt Myrzaqasymovtyń aıtýynsha, atalǵan jaǵdaıǵa baılanysty balalarǵa arnalǵan juqpaly aýrýhananyń bas dárigeri jumysynan bosatyldy.
Oblys ákiminiń orynbasary Erkebulan Daýylbaev Densaýlyq saqtaý basqarmasynyń basshysyna az ǵana ýaqytta anyqtalǵan barlyq kemshilikterdi joıýdy tapsyrdy.
