Sanıtarlyq-epıdemıologııalyq baqylaý: Kásipkerlerge 753 mln teńgeniń aıyppuly salyndy
«Aı saıyn búkil respýblıka boıynsha Ulttyq saraptaý ortalyǵynyń 7 myńǵa jýyq mamany shamamen 7,2 mln zertteý jumysyn júrgizedi. Qyzmetkerlerimizdiń osy jumysynyń arqasynda halyqtyń densaýlyǵyna qater tóndiretin, talapqa saı kelmeıtin ónimder dál mezgilinde anyqtalyp, ınfektsııalyq aýrýlardyń taralýyna jol berilmeıdi. Osylaısha, ónim qaýipsizdigine aı saıyn ótkiziletin monıtorıng halyq tutynatyn 32 myńnan astam taǵam ónimderi men taýarlardy qamtydy. Onyń 19,6 paıyzy tehnıkalyq reglamentterdiń talaptaryna sáıkes bolmaı shyqty. Osy faktiler boıynsha 1 myńnan asa uıǵarym jazylyp berildi. 38 mln teńgeniń aıyppuly salyndy. Aınalymnan 16 mln teńgeniń 29 tonna qaýipti ónimi tárkilendi», - dedi QR Densaýlyq saqtaý mınıstrligi Taýarlar men kórsetiletin qyzmetterdiń sapasy men qaýipsizdigin baqylaý komıteti tóraıymy Lıýdmıla Bıýrabekova OKQ-da ótken baspasóz máslıhatynda.
Lıýdmıla Bıýrabekova sonymen qatar, epıdemıologııalyq ahýal týraly da sóz qozǵady.
«Alǵashqy jartyjyldyqta asa qaýipti ınfektsııalardyń tirkelý jaǵdaıy kezdesken joq. Ótken jyldyń tıisti kezeńimen salystyrǵanda 32 ınfektsııa boıynsha aýrý jaǵdaıyn azaıtýǵa qol jetkizildi. Atap aıtqanda, A gepatıtti vırýs deńgeıi 2,5 esege, epıdemııalyq paratıt 2,6 esege, menıngogok ınfektsııasy 49,4 paıyzǵa, salmonoloz 26,5 paıyzǵa tómendedi. Qyzylsha aýrýynyń jıi tirkelýine baılanysty shara qabyldanyp jatyr. Qazirge deıin elimizde qyzylshaǵa shaldyǵý boıynsha 9 jaǵdaı tirkeldi. Atalmysh aýrý vaktsınatsııadan ótpegen balalarda kezdeskenin atap ótý kerek», - dedi komıtet basshysy.
Komıtet basshysy sanıtarlyq-epıdemıologııalyq salada erekshe tártippen 20 myńǵa tarta tekserý jumysy júrgizilgenin tilge tıek etti.
«Olardyń 16 600 boıynsha buzýshylyq anyqtalyp, 753 mln teńgeniń aıyppuly salyndy. Sol sekildi jospardan tys tekserý kezinde 2 485 nysanda 8 myńǵa tarta buzýshylyq anyqtalyp, oǵan jol bergender 150 mln teńgeniń aıyppulyn arqalady. Sanıtarlyq-epıdemıologııalyq saladaǵy negizgi buzýshylyqtar retinde ónimderdiń saqtalý merzimin qadaǵalamaýyn, medıtsınalyq tekseristerdiń bolmaýyn, merzimi ótken ónimderdi satý, as blogyndaǵy tazalyqtyń azdyǵyn atap ótýge bolady», - dedi Lıýdmıla Bıýrabekova.