Sanıtarlyq dárigerler kene entsefalıti maýsymynyń bastalǵanyn eskertti
ASTANA. QazAqparat - Sanıtarlyq dárigerler maýsym aıynyń alǵashqy jartysynan qyrkúıekke deıin ulasatyn kene entsefalıti epıdemıologııalyq maýsymynyń bastalǵanyn eskertti, dep habarlaıdy «QazAqparat» HAA tilshisi.
Qazaqstannyń bas sanıtarlyq dárigeri Jandarbek Bekshınniń málimdeýinshe, 2016 jyly kene shaqqan 11 356 adam medıtsınalyq kómekke júgingen, onyń 10443-i (92%) ımmýnoglobýlınmen profılaktıkalyq em qabyldaǵan.
Qazaqstanda kene entsefalıti boıynsha endemııalyq úsh óńir bar, olar - Almaty oblysy, Shyǵys Qazaqstan oblysy, Almaty qalasy jáne onyń mańaıy. Sońǵy jyldary Aqmola oblysynda da kene shaǵý oqıǵalary tirkele bastady.
Osyǵan baılanysty, kásibı sebeptermen keneniń tabıǵı oshaqtarynda bolýǵa májbúr tulǵalar (ormanshylar, ańshylar jáne ózge de orman-ańshylyq sharýashylyǵynyń jumysshylary) kene entsefalıtine qarsy profılaktıkalyq ımmýnızatsııadan ótýde.
Sonymen birge, kóktemde jáne kúzde endemııalyq aýmaqtarda balalar men úlkenderdi saýyqtyrý oryndarynda, keneniń tabıǵı oshaǵynda bolýǵa májbúr mamandardyń jumys ornynda, demalys jáne týrızm bazalarynyń aýmaqtarynda, baý-baqsha kooperatıvterinde, orman alaptarynyń aýmaǵynda, turmystyq-sharýashylyq maqsatta eldi meken turǵyndary jıi baratyn oryndarda kenege qarsy dári sebý jumystary júrgiziledi.
