Sanıtarlyq bekette kóligimen polıtseıdiń aıaǵyn basyp ketken qyzylordalyq jaýapqa tartyldy
Qyzylorda qalasynyń 28 jastaǵy turǵyny «Toyota Camry» kóligimen Jalaǵash aýdany Buqarbaı batyr aýyly tusynda ornalasqan sanıtarlyq beketke keledi. Onda polıtsııa qyzmetkerleri aýdan ortalyǵyna barýǵa ruqsat etpeıdi. Sol sátte ol dórekilik kórsetip, tártip saqshylaryn balaǵattaıdy. Kóligimen polıtsııa qyzmetkeriniń aıaǵyn basyp ketedi. Odan keıin oqıǵa ornynan boı tasalaıdy.
«Bılik ókilin qorlaǵan azamat ustalyp, polıtsııa bólimine jetkizildi. Oǵan qatysty karantın rejımin buzǵany úshin QR Ákimshilik quqyq buzýshylyq týraly kodeksiniń 476-babyna sáıkes (tótenshe jaǵdaı rejımin buzý) ákimshilik is qozǵalyp, aýdandyq sotqa joldandy. Jalaǵash aýdandyq sotynyń qaýlysymen quqyq buzýshy eki táýlikke qamaldy. Odan bólek, QR Qylmystyq kodeksiniń 378-babynyń 1-bóligimen (bılik ókilin qorlaý) sotqa deıingi tergep – tekserý amaly júrgizilip jatyr. Polıtsııa kúdiktini qolhatpen bosatty», - dep málim etti Qyzylorda oblystyq polıtsııa departamentiniń baspasóz qyzmeti.