Sanıtarlyq baqylaýdyń jańa mınıstrlikke aýysýy talaptardy azaıtý jumysyna keri áserin tıgizbeıdi - UEM

ASTANA. QazAqparat - QR Ulttyq ekonomıka mınıstrligi kásipkerlikti damytý departamentiniń dırektory Ǵalııa Joldybaevanyń aıtýynsha, sanıtarlyq epıdemıologııalyq baqylaý qyzmetiniń jańadan qurylǵan densaýlyq saqtaý mınıstrligine aýysýy osy saladaǵy tekseris talaptaryn azaıtýǵa baılanysty qazirgi jumysqa keri áserin tıgizbeıdi, dep xabarlaıdy QazAqparat tilshisi.

"Endi, tekserister bir mınıstrlikten ekinshi mınıstrlikke aýysqanda kóp ózgeris bolmaıdy dep oılaımyn. Qazirgi kezde bir mınıstrlikte bolǵandyqtan, tekserý paraqtaryn birlesken buıryqtarmen bekitip jatyrmyz. Bul degenimiz, buǵan deıin tekserý paraqtary bir mınıstrlikpen bekitilse, endi birlesken buıryqpen bekitiletin bolady", - dedi Joldybaeva búgin Ortalyq kommýnıkatsııalar qyzmetinde ótken baspasóz máslıxatynda.

Onyń aıtýynsha, endigi kezekte barlyq buıryqtardy eki mınıstrlik birlesip qabyldasa da, ondaı jumys tekserý paraqtaryndaǵy talaptardy azaıtý jumysyna keri áserin tıgizbeýi tıis. Sebebi osy jumyspen aınalysatyn mamandardyń quramy ózgermeıdi. "Endi, biz tekseristerdi 10 paıyzǵa qysqartamyz, 20 paıyzǵa qysqartamyz, sosyn 80 tekserý paraqtaryndaǵy talaptardy qysqartamyz dep jatyrmyz. Osynyń bárin iske asyratyn bolsaq, bızneske úlken kómek bolady", - dep atap kórsetti departament basshysy.