Sanıtarlyq baqylaý qyzmeti jańa mınıstrlikke aýysatyn boldy - vıtse-mınıstr Tsoı
"Iá, sanıtarlyq baqylaý qyzmeti bizge aýysady. Bul jospar emes. Prezıdenttiń jarlyǵy shyqty. Ol mindetti túrde jańa mınıstrliktiń quramyna kiretin bolady. Qazirgi kezde atalǵan qurylymdy aýystyrý sharalary júrgizilip jatyr", - dedi Tsoı QazAqparat tilshisine bergen suxbatynda.
Aıta keteıik, sanıtarlyq-epıdemıologııalyq baqylaý qyzmetin burynǵy densaýlyq saqtaý jáne áleýmettik damý mınıstrligine aýystyrý máselesi birnshe ret talqylanǵan bolatyn. Tipti, Úkimet otyrysynda da kóterilgen. Jaqynda "Atameken" ulttyq palatasy janyndaǵy Kásipkerler quqyǵyn qorǵaý jáne sybaılas jemqorlyqqa qarsy is-qımyl keńesiniń tóraǵasy Qaıyrbek Súleımenov sanıtarlyq-epıdemıologııalyq qyzmetti densaýlyq saqtaý salasyna aýystyryp qana qoımaı, onyń bastyǵyn vıtse-mınıstr qyzmetine deıin kóterýdi usyndy. Sebebi negizsiz ári aqylǵa syımaıtyn sanıtarlyq tekseristerdi nátıjesinde kásipkerler shyǵynǵa batyp jatady.
"Ondaı tájirıbe keńester kezinde bolǵan. Sony qaıtarý qajet. Esterińizde bolsa, Qazaqstanda bas sanıtarlyq dáriger ylǵı mınıstrdiń birinshi orynbasary qyzmetin atqardy. Sol kezde atalǵan qyzmettiń abyroıy boldy. Fakýltter jumys istedi. Medıtsınalyq ýnıversıtetter arnaıy maman oqytty. Bilýimshe, qazir ondaı mamandyq joq. Sonyń saldarynan sanıtarlyq-epıdemıologııalyq qyzmetke kásibı biliktiligi tómen mamandar keledi. Tipti, medıtsınalyq mamandyǵy joq adamdar bar. Al olardyń ne úshin kelip júrgeni aıtpasa da túsinikti", - dedi Súleımenov Bas prokýratýrada bolǵan keńeste.
Qazirgi kezde sanıtarlyq baqylaý qyzmeti QR Ulttyq ekonomıka mınıstrliginiń Tutynýshylar quqyqtaryn qorǵaý komıtetine kiredi.