Sanıtarlyq baqylaý qyzmeti jańa mınıstrlikke aýysa ma
ASTANA. QazAqparat - QR Ulttyq ekonomıka mınıstrligi Tutynýshylar quqyqtaryn qorǵaý jónindegi komıtet tóraǵasynyń orynbasary Nurqan Sádýaqasovtyń aıtýynsha, keshegi Densaýlyq saqtaý jáne áleýmetti damý mınıstrligi kezinde atalǵan másele talaı ret talqylanǵan. Biraq bári bir sheshimge kele almady, dep xabarlaıdy QazAqparat tilshisi.
«Endi, sanıtarlyq-epıdemıologııalyq baqylaý qyzmetin jańa mınıstrlikke bere me, joq pa, ony dál qazir aıta almaımyn. Búgin saǵat 10-da Premer bárin jınap, sol jerde osy máseleni qoıady degen. Texnıkalyq reglamentter sanepıdpen birge kete me, joq álde, Ulttyq ekonomıka mınıstrliginde qala ma, osyny talqyǵa salýy qajet. Iá, Densaýlyq saqtaý jáne áleýmettik damý mınıstrligi kezinde sanıtarlyq baqylaýdy soǵan aýystyrý máselesi bolǵan. Shyny kerek, san alýan pikirler aıtyldy. Biraq bir sheshimge kele almady. Sondyqtan bárin úkimet sheshýi tıis», - dedi Sádýaqasov QazAqparat tilshisine bergen suxbatynda.
Aıta keteıik, sanıtarlyq-epıdemıologııalyq baqylaý qyzmetin burynǵy Densaýlyq saqtaý jáne áleýmettik damý mınıstrligine aýystyrý máselesi talaı ret talqylanǵan bolatyn. Tipti, Úkimet otyrysynda da kóterilgen. Jaqynda «Atameken» ulttyq palatasy janyndaǵy Kásipkerler quqyǵyn qorǵaý jáne sybaılas jemqorlyqqa qarsy is-qımyl keńesiniń tóraǵasy Qaıyrbek Súleımenov sanıtarlyq-epıdemıologııalyq qyzmetti densaýlyq saqtaý salasyna aýystyryp qana qoımaı, onyń bastyǵyn vıtse-mınıstr qyzmetine deıin kóterýdi usyndy . Sebebi sanıtarlyq tekseristerdiń nátıjesinde kásipkerler shyǵynǵa batyp jatady.
«Ondaı tájirıbe keńester kezinde bolǵan. Sony qaıtarý qajet. Esterińizde bolsa, Qazaqstanda bas sanıtarlyq dáriger ylǵı mınıstrdiń birinshi orynbasary qyzmetin atqardy. Sol kezde atalǵan qyzmettiń abyroıy boldy. Fakýltetter jumys istedi. Medıtsınalyq ýnıversıtetter arnaıy maman oqytty. Bilýimshe, qazir ondaı mamandyq joq. Sonyń saldarynan sanıtarlyq-epıdemıologııalyq qyzmetke kásibı biliktiligi tómen mamandar keledi. Tipti, medıtsınalyq mamandyǵy joq adamdar bar», - dedi Súleımenov Bas prokýratýrada bolǵan keńeste.
