Sanıtarlyq avıatsııanyń tikushaqtary 300-den astam ushý saparyn jasady
ASTANA. 11 aqpan. QazAqparat - Elbasy N.Á.Nazarbaevtyń tapsyrmasy boıynsha «Salamatty Qazaqstan» baǵdarlamasynyń aıasynda mobıldi medıtsınany damytý jumysy jalǵasýda. Aýyl turǵyndarynyń mamandandarylǵan medıtsınalyq kómekke qoljetimdiligin qamtamasyz etý jáne kórsetiletin qyzmetterdiń jedeldigin arttyrý kóliktik medıtsınanyń basymdyqty mindeti bolyp tabylady, dep habarlady Pm.kz saıty.
«Elde ozyq emdeý-dıagnostıkalyq keshender, medıtsınanyń negizgi baǵyttary, onyń ishinde eń jańa baǵyttar boıynsha ondaǵan ortalyqtar quryldy, kóliktik medıtsına damytylýda. Bizde medıtsınalyq poıyzdar, avtokólik, medıtsınalyq avıatsııa paıdalanylady», - dep málim etti Elbasy N.Nazarbaev «Áleýmettik-ekonomıkalyq jańǵyrtý - Qazaqstan damýynyń basty baǵyty» atty Qazaqstan halqyna Joldaýynda.
Búginde Qazaqstannyń mobıldi medıtsınasynda konsýltatıvtik-dıagnostıkalyq poıyzdar, jyljymaly medıtsınalyq keshender, sanıtarlyq tikushaqtar men reanımobılder bar.
Densaýlyq saqtaý mınıstrliginiń aqparaty boıynsha, arnaıy dárigerler brıgadasy jumys isteıtin jyljymaly medıtsınalyq keshenderdiń bazasynda 2011 jyly búkil respýblıka boıynsha 98 myńnan astam adam qaraldy. Atap aıtqanda, 115 myńǵa jýyq zerthanalyq-dıagnostıkalyq zertteý júrgizildi jáne 86 myń konsýltatsııa berildi.
«Densaýlyq» jáne «Járdem» konsýltatıvtik-dıagnostıkalyq poıyzdarymen qosa, 2011 jyly úshinshi poıyz - «Salamatty Qazaqstan» poıyzy jolǵa shyqty. 110 stansanyń turǵyndaryna 260 myńnan astam emdeý-dıagnostıkalyq qyzmetter kórsetildi, 52 myńnan astam adam dárigerlerge qaraldy, olardyń 15 myńǵa jýyǵy balalar.
Aıta ketý kerek, jaraqattanýshylyqty azaıtý úshin elimizde shuǵyl medıtsınalyq kómek kórsetý qyzmeti jetildirilýde. Ótken jyly Sanıtarlyq avıatsııa jónindegi respýblıkalyq úılestirý ortalyǵy ashyldy. Ortalyq 2011 jyly 323 shuǵyl ushý saparyn jasady.
Sondaı-aq jedel járdem qyzmetin jańǵyrtý jumystary jalǵasýda - 73 reanımobıl satyp alyndy jáne jappaı GPS-navıgatsııa júıesi engizilýde.
«Salamatty Qazaqstan» baǵdarlamasynyń aıasynda mobıldi medıtsına qyzmetimen elimizde jyl saıyn 1,5-2 mln. adamdy qamtý josparlanýda. Bul shara halyqtyń ortasha ómir jasyn uzartýǵa, aýrýlar men ólim-jitim kórsetkishterin tómendetýde jáne alys aýyldardyń turǵyndary úshin mamandandyrylǵan medıtsınalyq kómekke degen qoljetimdilikti jaqsartýǵa múmkindik beredi.
