Sanıtarlyq avıatsııa jyl basynan beri oqıǵa ornynda 86 operatsııa jasaǵan
ASTANA. QazAqparat - Sanıtarlyq avıatsııa dárigerleri jańa bosanǵan jas áıeldi aman alyp qaldy. Bul týraly QR Densaýlyq saqtaý mınıstrliginiń baspasóz qyzmeti habarlady.
Baspasóz málimetterine qaraǵanda, 2018 jylǵy 31 tamyzda sanıtarlyq avıatsııa qyzmetine Qyzylorda oblystyq perınataldyq ortalyǵynda jatqan 1984 jyly týǵan patsıentke efferentti terapııa - dıalız jedel júrgizý qajettiligi týraly ótinim túsken. Jas bosanǵan áıel aýyr operatsııalyq rásimderden ótken jáne efferentolog mamandar keńesi men mamandandyrylǵan terapııa kórsetýge muqtaj bolǵan.
2018 jylǵy 1 qyrkúıek kúni oǵan mamandandyrylǵan kómek kórsetý maqsatynda mamandarmen jáne qajetti medıtsınalyq qural-jabdyqtarmen sanavıatsııa borty ushyp shyqqan.
Efferentolog dárigeriniń keńesinen keıin sol ornynda patsentke medıtsınalyq kómek kórsetilip, dıalız rásimi júrgizilgen. Bul rásim «búırek jetkiliksizdigi» týyndaǵan - eki búırek óziniń ádettegi qyzmetin oryndaýǵa qabiletsiz (nemese múldem qabileti joq) jaǵdaıda qajet. Dıalız - bul aǵzadan tirshilik etý ónimderin jáne artyq suıyqtyqty jasandy shyǵarý protsesi.
Mınıstrliktiń málimetterine qaraǵanda, sanıtarııalyq avıatsııa qyzmetiniń arqasynda 2018 jylǵy 7 aı ishinde QR óńirlerinde 1 400 astam mamandandyrylǵan medıtsınalyq qyzmetter kórsetilip, oqıǵa ornynda mamandar 86 operatsııa jasaǵan.
Ortalyq qurylǵannan beri sanıtarııalyq avıatsııa qyzmeti 15 myńnan astam qazaqstandyqtarǵa kómek kórsetken. Onyń ishinde: akýsherlik patologııasy bar 2 537 áıelge, 2 460 jańa týǵan nárestege, balalar jasyndaǵy patologııasy bar 3 249 balaǵa, qan aınalym júıesiniń aýrýy boıynsha 2 365 patsıentke, 3 177 jazataıym oqıǵalardan, ýlaný men jaraqattanýdan zardap shekkenderge jáne ózge de aýrýlary bar 1 458 patsıentterge kómek kórsetilgen.
Esterińizge sala keteıik, sanıtarlyq avıatsııa qyzmetiniń negizgi maqsaty - medıtsınalyq kómekti qoljetimdi etý jáne jedel kórsetý. Bul másele ásirese, aýyl halqy úshin ózekti. Óıtkeni munda aýyldyq eldi mekenderde joq mamandandyrylǵan medıtsınalyq kómek týraly aıtylyp otyr.
