Sanıtarlyq avıatsııa qyzmeti arqyly jyl basynan beri 700-ge tarta medıtsınalyq kómek kórsetildi
ASTANA. QazAqparat - 2014 jyldyń 4 aıy ishinde elimizdiń sanıtarlyq avıatsııa qyzmeti 517 ret ushyrylym jasap, 700-ge tarta medıtsınalyq kómek kórsetti. Onyń ishinde 516 naýqas tıisti emdeý mekemelerine tasymaldandy, 140 konsýltatıvtik qyzmet kórsetildi jáne oqıǵa ornynda 40 operatsııa jasaldy.
Bul týraly QR Densaýlyq saqtaý mınıstrliginiń baspasóz qyzmeti habarlady.
Atalǵan merzimde sanıtarlyq avıatsııany shaqyrýǵa negiz bolǵan sebepter boıynsha alǵashqy orynda balalarǵa shuǵyl kómek kórsetý qajettigi (160 oqıǵa) tur. Odan keıin: jańa týylǵan nárestelerge jedel kómek kórsetý (138 oqıǵa), akýsherlik tájirıbede shuǵyl kómek (130 oqıǵa), qan aınalymy júıesi aýrýlary jáne jaraqattanýshylyq sııaqty sebepter bar.
«Áýe kóligimen kórsetiletin medıtsınalyq qyzmet kóleminiń artýy Qazaqstanda sanıtarlyq avıatsııanyń damyp kele jatqanyn jáne respýblıka turǵyndarynyń oǵan muqtaj ekenin kórsetedi. Sanıtarlyq avıatsııa respýblıkalyq ortalyǵy qyzmetkerleri «Salamatty Qazaqstan» memlekettik baǵdarlamasyn tıimdi iske asyrýda barlyq qajetti is-sharalardy qabyldaıtyn bolady», - delingen habarlamada.
