Sanıtarlyq talaptar ózgerdi: Kafe men meıramhanaǵa jańa shekteýler engizile me
ASTANA. KAZINFORM — Sanıtarlyq talaptar ózgergenimen qoǵamdyq tamaqtaný oryndaryna talaptar qatańdatylmaıdy, dep habarlaıdy Sanıtarııalyq-epıdemıologııalyq baqylaý komıtetiniń baspasóz qyzmeti.
Densaýlyq saqtaý mınıstriniń 2026 jylǵy 16 naýryzdaǵy № 34 buıryǵymen «Qoǵamdyq tamaqtaný obektilerine qoıylatyn sanıtarııalyq-epıdemıologııalyq talaptar» sanıtarııalyq qaǵıdalaryna (2022 jylǵy 17 aqpandaǵy № QR DSM-16 buıryq) ózgerister engizildi.
Engiziletin ózgeristerge sáıkes balalar sanatorııleri men saýyqtyrý uıymdarynyń sondaı-aq bilim berý jáne tárbıeleý obektileri ashanalary men tústený zaldary aýdandarynyń normalary bólingen.
Bul rette, kafeler men meıramhanalardy qosa alǵanda, qoǵamdyq tamaqtaný obektileri alańdarynyń normalary ózgerissiz qaldy.
Budan basqa, 2026 jylǵy 1 shildeden bastap kúshine enetin 2026 jylǵy 9 qańtardaǵy Qazaqstan Respýblıkasynyń jańa Qurylys kodeksiniń qabyldanýyna baılanysty Sanıtarııalyq qaǵıdalardyń birqatar tarmaqtaryna jańa Qurylys kodeksiniń tujyrymyna sáıkes silteme normasyn aýystyrý bóliginde ózgerister engizildi («sáýlet, qala qurylysy jáne qurylys salasyndaǵy memlekettik normatıvter» degen tujyrym «sáýlet, qala qurylysy jáne qurylys qyzmeti salasyndaǵy memlekettik normatıvtik qujattar»-ǵa aýystyryldy).
— Osylaısha, jańa Qurylys kodeksine sáıkes redaktsııalyq túzetýler bóliginde ǵana ózgerister engizildi jáne qoǵamdyq tamaqtaný obektilerine qoıylatyn sanıtarlyq-epıdemıologııalyq talaptardy qatańdatýdy kózdemeıdi. Osyǵan baılanysty, 2026 jylǵy 1 shildeden bastap qoǵamdyq tamaqtaný obektilerine qoıylatyn talaptardy qatańdatý týraly aqparat shyndyqqa janaspaıdy, — delingen habarlamada.
Buǵan deıin Şýchede 9 adamnyń ómirin jalmaǵan órtten keıin kafe ıesi qamaýǵa alynǵanyn jazǵanbyz.
