Sanıtarlyq dárigerler tekserý bastady: Kókshetaýda ashanadan taraqandar tabyldy
ASTANA.KAZINFORM — Kókshetaý qalasynyń turǵyny áleýmettik jelide oblys ortalyǵyndaǵy saýda ortalyqtarynyń biriniń ashanasynda taraqandar baryn aıtyp shaǵymdanǵan, dep habarlaıdy Kazinform tilshisi.
Kókshetaý turǵyny túsirgen vıdeodan jándikterdiń ústelder men azyq-túlik ústinde órip júrgenin kórýge bolady.
Qalalyq sanıtarlyq-epıdemıologııalyq baqylaý basqarmasynyń habarlaýynsha saýda úıiniń ashanasynan taraqan tabylǵany týraly aqparatqa sáıkes atalǵan nysanda jospardan tys tekserý júrgiziledi.
— Halyqtyń sanıtarlyq-epıdemıologııalyq salaýattylyǵy salasyndaǵy zańnama talaptarynyń buzylýy anyqtalǵan jaǵdaıda jaýapty tulǵalarǵa QR zańnamasyna sáıkes ákimshilik sharalar qoldanylady. Sondaı-aq anyqtalǵan zań buzýdy joıý týraly uıǵarym shyǵarylady, — dep atap ótti departament.
Buǵan deıin Pavlodarda qyz uzatý toıynan keıin 33 adam ýlanǵanyn habarlaǵan edik.