Sanıtarııalyq talapty buzǵan 470 demalys nysanyna shekteý qoıyldy
ASTANA. KAZINFORM — Jazǵy týrıstik maýsym bastalǵaly elimizdegi týrıstik aımaqtar men qoǵamdyq jaǵajaılarda sanıtarııalyq baqylaý kúsheıdi. Osy kezeńde sanıtarııalyq talaptardy saqtamaı jumys istegen 470 nysannyń qyzmeti shekteldi.
Bul týraly Ortalyq kommýnıkatsııalar qyzmetinde ótken brıfıngte QR Densaýlyq saqtaý mınıstrligi Sanıtarııalyq-epıdemıologııalyq baqylaý komıtetiniń tóraǵasy Sarhat Beısenova aıtty.
Onyń sózinshe, sanıtarııalyq-epıdemıologııalyq qyzmettiń negizgi mindeti — demalys oryndaryndaǵy tazalyqty qadaǵalap, juqpaly aýrýlardyń aldyn alý.
— Qazir Komıtettiń aýmaqtyq bólimsheleri 1 225 týrıstik aımaq pen 304 qoǵamdyq jaǵajaıdyń sanıtarııalyq jaǵdaıyn turaqty baqylaýda ustap otyr. Júrgizilgen jumystar nátıjesinde anyqtalǵan zańbuzýshylyqtardy joıý úshin 900 usynym berildi. Onyń basym bóligi ruqsat qujattarynyń bolmaýyna qatysty. Sonymen qatar sanıtarııalyq talaptardy buzyp jumys istegen nysandarǵa qatysty 470 jedel shara qabyldanyp, olardyń qyzmeti shekteldi, — dedi Sarhat Beısenova.
Spıkerdiń aıtýynsha, budan bólek 19 jospardan tys tekserý júrgizilgen. Sonyń nátıjesinde sottar 6 jaǵdaıda kináli tulǵalardy ákimshilik jaýapkershilikke tartý týraly sheshim shyǵarǵan.
Onyń aıtýynsha, qabyldanǵan sharalardyń nátıjesinde 247 nysan anyqtalǵan zańbuzýshylyqtardy joıyp, sanıtarııalyq-epıdemıologııalyq qorytyndy alǵan.
— Sanıtarııalyq-epıdemıologııalyq qorytyndy nysannyń tekserý kezinde sanıtarııalyq talaptarǵa saı ekenin kórsetedi. Al keıin de sanıtarııalyq talaptardyń saqtalýy Komıtettiń aýmaqtyq bólimsheleriniń turaqty baqylaýynda bolady, — dedi komıtet tóraǵasy.
Eske salaıyq, buǵan deıin Densaýlyq saqtaý mınıstrligi taǵamnan ýlaný derekteri boıynsha 8 qylmystyq is qozǵalǵanyn málimdegen bolatyn.
