Sanıtarııalyq talaptar buzylǵan: Densaýmın oqýshylardyń ýlanýyna baılanysty málimdeme jasady
ALMATY. KAZINFORM — QR Densaýlyq saqtaý mınıstrligi Almatyda oqýshylar arasynda ishek ınfektsııasynyń tirkelýine baılanysty jedel sharalar qabyldanǵanyn habarlady.
Mınıstrlik málimetinshe, Almatydaǵy Respýblıkalyq fızıka-matematıka mektebi oqýshylarynyń arasynda ishek ınfektsııasynyń 48 jaǵdaıynyń tirkelýine baılanysty sanıtarııalyq-epıdemııaǵa qarsy keshendi is-sharalar uıymdastyrylǵan.
— Tamaqtaný blogyna tekserý júrgizilip, sanıtarııalyq talaptardyń buzylýy anyqtaldy. Bes qaýly shyǵarylyp, shekteý sharalary engizildi jáne dezınfektsııa júrgizildi. Naýqastarmen baılanysta bolǵan adamdar medıtsınalyq baqylaýǵa alyndy, — dep habarlady mınıstrlikten.
Sondaı-aq mamandar «Master Food» JShS-niń tamaqtaný blogyn tekserý barysynda azyq-túlik ónimderin saqtaý, daıyn taǵamdardyń táýliktik synamalaryn alý jáne tamaqtanýdy uıymdastyrý talaptarynyń buzylǵanyn anyqtaǵan. Qazir ınfektsııa kózin anyqtaý maqsatynda sý men azyq-túlik ónimderinen synamalar, shaıyndylar alynyp, tamaqtaný blogynyń qyzmetkerleri tekserilgen.
— Zerthanalyq zertteýler jalǵasyp jatyr. Tekserý qorytyndysy boıynsha mektep pen ashananyń qyzmetin toqtata turýdy, jekelegen taǵamdardy satýǵa tyıym salýdy, ýaqytsha sanıtarııalyq shekteý sharalaryn engizýdi jáne qajetti ilespe qujattary joq sút ónimderin alyp qoıýdy kózdeıtin bes qaýly shyǵaryldy, — delingen málimdemede.
Vedomstvoda barlyq naýqastar emdeýge jatqyzylǵany jáne olardyń jaǵdaıy turaqty ekeni atap ótildi. Reanımatsııalyq kómekti qajet etetin patsıentter joq.
Odan bólek tekserý nátıjeleri boıynsha materıaldar zańnamada belgilengen tártippen qaraý jáne protsestik sheshim qabyldaý úshin quqyq qorǵaý organdaryna jiberilgen.
Eske salaıyq, buǵan deıin Almatyda RFMM oqýshylary jedel ishek ınfektsııasynyń belgilerimen emhanaǵa jatqyzylǵany belgili boldy.
Keıin RFMM ákimshiligi oqýshylardyń aýrýhanaǵa túsýine baılanysty túsinik berdi. 14–16 qazan aralyǵynda mektep sabaqtary onlaın formatta ótedi.
Sondaı-aq atalǵan derek boıynsha Bostandyq aýdandyq polıtsııa basqarmasy janyndaǵy polıtsııa bóliminde qylmystyq is qozǵaldy.
