Sanıtarııalyq qorytyndysy joq lagerler balalardy qabyldaı almaıdy - DSM
ASTANA. KAZINFORM – Qazaqstanda sanıtarııalyq-epıdemıologııalyq qorytyndysy bar balalardy saýyqtyrý ortalyqtary ǵana jumys istep, balalardy qabyldaı alady.
Bul týraly Ortalyq kommýnıkatsııalar qyzmetinde ótken brıfıngte QR Densaýlyq saqtaý mınıstrligi Sanıtarııalyq-epıdemıologııalyq baqylaý komıtetiniń tóraǵasy Sarhat Beısenova aıtty.
Onyń sózinshe, jazǵy demalys kezeńinde sanıtarııalyq-epıdemıologııalyq qyzmet balalardyń saýyqtyrý uıymdaryndaǵy qaýipsizdikke erekshe kóńil bólip otyr.
– Qazir elimizdiń óńirlerindegi 172 maýsymdyq balalardy saýyqtyrý ortalyǵy sanıtarııalyq-epıdemıologııalyq qorytyndy alyp, balalardy qabyldap jatyr. Ár lager jumysyn bastar aldynda sanıtarııalyq talaptarǵa sáıkestigi jan-jaqty baǵalanady. Osy kezde aýyz sýdyń, basseın sýynyń, al jaǵajaıy bar lagerlerde sý, topyraq jáne qumnyń sapasy zerthanalyq turǵyda tekseriledi, – dedi Sarhat Beısenova.
Spıkerdiń aıtýynsha, sanıtarııalyq-epıdemıologııalyq qorytyndysy joq balalardy saýyqtyrý ortalyqtarynyń jumysyna jol berilmeıdi.
– Sanıtarııalyq-epıdemıologııalyq qorytyndy alǵan lagerlerdiń tizimi Komıtettiń resmı ınternet-resýrsynda ashyq jarııalanyp, apta saıyn jańartylyp otyrady. Sondyqtan ata-analar balalaryn lagerge jiberer aldynda osy aqparatpen mindetti túrde tanysqany jón, – dedi komıtet tóraǵasy.
Sarhat Beısenova ata-analarǵa balany lagerge jiberer aldynda onyń densaýlyǵyna nazar aýdarýǵa keńes berdi.
– Balalardyń jolǵa tez buzylatyn taǵamdardy, ásirese et, balyq, sút ónimderin, krem qosylǵan kondıterlik ónimderdi jáne tátti gazdalǵan sýsyndardy alyp shyqpaǵany durys. Sondaı-aq kún ótýdiń jáne sýsyzdanýdyń aldyn alý úshin balaǵa bas kıim, jetkilikti mólsherde aýyz sý, jeńil kıim jáne kúnnen qorǵaıtyn quraldar daıyndap berý qajet, – dedi Sarhat Beısenova.
Onyń aıtýynsha, sanıtarııalyq-epıdemıologııalyq qyzmet balalardyń jazǵy demalysynyń qaýipsizdigin qamtamasyz etý, juqpaly aýrýlardyń aldyn alý jáne halyqtyń sanıtarııalyq-epıdemıologııalyq qaýipsizdigin saqtaý baǵytyndaǵy jumystaryn jalǵastyra beredi.
Aıta keteıik, buǵan deıin Densaýlyq saqtaý mınıstrligi bıyl tirkelgen jiti ishek ınfektsııasy jaǵdaılarynyń 71 paıyzy balalar arasynda anyqtalǵanyn málimdegen edi.
