Sanıtarııalyq qyzmet mamandarynyń biliktilik júıesine engizilgen ózgerister kúshine endi

ASTANA. KAZINFORM – Jańartylǵan tártip «Densaýlyq saqtaý» daıarlaý baǵyty boıynsha bilimi bar mamandarǵa qoldanylady jáne sanıtarııalyq-epıdemıologııalyq qyzmet kadrlarynyń kásibı daıarlyǵyn baǵalaýdyń biryńǵaı, ashyq jáne obektıvti tetigin qalyptastyrýǵa baǵyttalǵan.

QR Densaýlyq saqtaý mınıstrligi Sanıtarııalyq-epıdemologııalyq baqylaý komıteti baspasóz qyzmetiniń habarlaýynsha, atalǵandarmen qatar buryn biliktilik sanattary bolǵan mamandar jańa talaptar men rásimder sheńberinde tıisti biliktilik deńgeıin alý quqyǵyn saqtaıdy.

Engizilgen ózgerister mynalardy qamtamasyz etedi:

· buryn berilgen biliktilik sanattarynyń sabaqtastyǵyn;

· biliktiliktiń deńgeılik modeline kezeń-kezeńimen kóshýdi;

· kásibı talaptardyń ashyqtyǵy men salystyrmalylyǵyn arttyrýdy;

· halyqtyń sanıtarııalyq-epıdemıologııalyq salamattylyǵy salasyndaǵy kadrlyq áleýetti nyǵaıtýdy.

Jańartylǵan tártipti iske asyrý densaýlyq saqtaý salasyndaǵy kadrlyq saıasatty damytýǵa, mamandardyń kásibı deńgeıin arttyrýǵa jáne úzdiksiz damýǵa yntalandyrýǵa, sondaı-aq sanıtarııalyq-epıdemıologııalyq qyzmettiń sapasy men tıimdiligin qamtamasyz etýge baǵyttalǵan.

Komıtet 2026 jylǵy 5 qańtardan bastap halyqtyń sanıtarııalyq-epıdemıologııalyq salamattylyǵy salasynda qyzmet atqaratyn densaýlyq saqtaý mamandarynyń biliktilik deńgeıin berý jáne rastaý tártibin retteıtin normatıvtik quqyqtyq aktilerge (QR DSM 2020 jylǵy 20 jeltoqsandaǵy № QR DSM-283/2020 buıryǵy) engizilgen ózgerister kúshine engenin habarlady.

Osyǵan deıin sanıtarııalyq qorǵaý aımaqtaryna qoıylatyn talaptar jańartylǵany týraly jazdyq.