Sanıtarııalyq-epıdemıologııalyq qyzmetti tsıfrlandyrý: esepterdi óńdeý 23,8%-ǵa qysqardy

Mınıstrlik málimetinshe, tsıfrlandyrýdyń nátıjesinde eseptilikti qolmen óńdeý kólemi 23,8%-ǵa qysqaryp, tsıfrlyq eseptilik kólemi 47,7%-ǵa artqan.

– Bızneske arnalǵan usynymdardy daıyndaý merzimi eki kúnnen 15 mınýtqa deıin qysqardy. Al baqylaý nysany týraly aqparat alý ýaqyty úsh kúnniń ornyna bir saǵatty quraıdy, – delingen habarlamada.

Júıe sondaı-aq jeke medıtsınalyq kitapshalardyń jappaı berilý belgilerin, standarttan tys medıtsınalyq tekserýlerdi jáne qosymsha tekserýdi qajet etetin ózge de yqtımal qaýipterdi avtomatty túrde anyqtaıdy.

Sonymen qatar sanıtarııalyq-epıdemıologııalyq qyzmettiń memlekettik ınspektorlarynyń barlyq áreketteri tsıfrlyq júıede tirkeledi. Bul baqylaý úderisiniń tolyq qadaǵalanýyn qamtamasyz etip, tekserý josparynan nysandardy negizsiz alyp tastaýǵa jol bermeıdi ári sybaılas jemqorlyq táýekelderin tómendetedi.

Mınıstrliktiń málimetinshe, Qazaqstanda alǵash ret myna baǵyttardy biriktirgen sanıtarııalyq-epıdemıologııalyq qyzmettiń biryńǵaı tsıfrlyq ekojúıesi quryldy:

• memlekettik sanıtarııalyq-epıdemıologııalyq baqylaý;

• dekrettelgen toptaǵy kásipter qyzmetkerleriniń medıtsınalyq tekserýleri;

• zerthanalyq zertteýler;

• kásiporyndardyń óndiristik baqylaýy;

• halyqty vaktsınatsııalaý monıtorıngi.

Vedomstvonyń atap ótýinshe, uzaq merzimdi perspektıvada sanıtarııalyq-epıdemıologııalyq qadaǵalaýdy tsıfrlandyrý sanıtarııalyq-epıdemıologııalyq ahýaldy turaqtandyrý úshin jedel basqarýshylyq sheshimder qabyldaýǵa, bızneske túsetin ákimshilik júktemeni azaıtýǵa, quqyq buzýshylyqtardyń aldyn alý jumystaryn kúsheıtýge jáne azamattardyń densaýlyǵy men qaýipsizdigin qorǵaý deńgeıin arttyrýǵa múmkindik beredi.

Aıta keteıik, elimizde biryńǵaı medıtsınalyq tsıfrly platforma qalaı jumys isteıtinin mynaý silteme arqyly oqı alasyz.