Sanıavıatsııa ushaǵynyń apatyn tergeý nelikten uzaqqa sozylyp ketti
ASTANA. QazAqparat - QR Investıtsııa jáne damý mınıstrligi 2017 jyly bolǵan sanıtarlyq avıatsııa ushaǵynyń apatqa ushyraýyna baılanysty bastalǵan tergeý isiniń nelikten sozylyp ketkenin túsindirdi, dep habarlaıdy QazAqparat tilshisi.
«Qazirgi tańda sanıtarlyq avıtsııa reısin oryndaǵan An-28 ushaǵyna qatysty kúrdeli tehnıkalyq saraptama jalǵasyp jatyr. Biz ony memleketaralyq avıatsııalyq komıtetpen birlesip ótkizýdemiz», - dedi QR Investıtsııa jáne damý vıtse-mınıstri Roman Sklıar.
Onyń aıtýynsha, borttyń «qara jáshiginen» aqaý tabylǵan.
«Onda ózdiginen jazatyn qural áýel bastan bolmaǵan. Bul jaǵdaıdy matematıkalyq turǵydan modeldeý kerek. Bizde ushaqtyń tómenge qaraı túsip, jerge qona bastaǵany týraly radardan berilgen maǵlumattar bar, sony paıdalanamyz», - dedi R. Sklıar.
Sondaı-aq, vıtse-mınıstr apatty jaǵdaı týraly ekıpaj baılanysqa shyqpaǵanyn jetkizdi.
«Apatty jaǵdaıda turǵanyn málim etpeı, áýejaıdyn mańyndaǵy dalaǵa qonǵan», - dep atap ótti vıtse-mınıstr.
Eske salaıyq, 2017 jyly 3 qazanda Almaty oblysy Іle aýdanynyń Mejdýrechınsk aýyly mańynda AN-28 ushaǵy apatqa ushyrap, órtenip ketti. Borttaǵy dárigerler Túrkistan oblysynda aýyr jaǵdaıda bosanatyn áıelge jedel kómek kórsetý úshin Almatydan Shymkentke attanǵan.
