Sanepıdstantsııa zerthanalary tamaq ónimderin tekserý jaǵynan elimizdiń Dúnıejúzilik saýda uıymyna kirýine daıyn - Respýblıkalyq sanepıdstantsııanyń bas dárigeri
ALMATY. 31 qazan. QazAqparat - Qazirgi tańda barlyq aýdandyq sanepıdstantsııalary kez kelgen tamaq ónimderin tekserýge qajetti zamanaýı qural-jabdyqtarmen jabdyqtalǵan. Bul týraly respýblıkalyq sanıtarlyq-epıdemıologııalyq stantsııanyń bas dárigeri Shalqynbaı Jandosov búgin QazAqparat tilshisine Almatyda ótip jatqan Dúnıejúzilik densaýlyq saqtaý uıymynyń Halyqaralyq medıtsınalyq-sanıtarlyq erejelerin júzege asyrý boıynsha kóptarapty memleketaralyq semınary kezinde aıtty.
«2005-2009 jyldary densaýlyq saqtaý salasyn reformalaý maqsatynda árbir aýdandyq sanepıdstantsııaǵa úkimet tarapynan 121 mıllıon teńgeden qarjy bólindi. Olardyń bári zamanaýı qural-jabdyqtarmen jabdyqtalǵan. Búgingi tańda elimiz Dúnıejúzilik saýda uıymyna kirýge árekettenip jatyr, oǵan bizdiń zerthanalarymyz saqadaı-saı», - dedi Sh.Jandosov. Shalqynbaı Ótegenulynyń sózine qaraǵanda, 2007 jyly qabyldanǵan Dúnıejúzilik densaýlyq saqtaý uıymynyń qandaı da bir elde juqpaly indet shyqqan kezde bul týraly ózge memleketterdi qulaǵdar etýdi mindetteýdi kózdeıtin Halyqaralyq medıtsınalyq-sanıtarlyq erejeleriniń (HMSE) mańyzy óte zor. Óıtkeni keıbir elder mundaı aýrýdy jasyryp, onyń arty úlken qaýip-qater týdyryp jatady. Sondyqtan HSME-ni júzege asyrý arqyly barlyq memleket ózge elderdegi ahýaldan kúndelikti habardar bolyp, asa qaýipti aýrý shyqan jaǵdaıda jergilikti jerlerdi jedel qulaqtandyryp, onyń etek almaýy úshin qaýiptiń aldyn alý sharalaryn júrgizip otyrady.
