Sanepıdqyzmettiń ǵylymı áleýetin kúsheıtý kerek - Úkimet saǵaty
NUR-SULTAN. QazAqparat – Búgin Parlament Májilisindegi Úkimet saǵatynda densaýlyq saqtaý problemalaryn talqylaý kezinde depýtat Jámılá Nurmanbetova SES ǵımarattarynyń ábden tozǵanyn aıtty, dep habarlaıdy QazAqparat tilshisi.
«Sońǵy 5-7 jylda qyzmetten joǵary bilikti mamandardyń ketýine jol berý de ótkir problema bolyp otyr, bul tutastaı alǵanda, qyzmettiń kadr quramynyń biliktiligine áserin tıgizdi. Sanepıdqyzmet jumyskerleriniń joǵary kásibı sheberligin qalyptastyrý úshin tálimgerlik tetikterin damytý, stýdentterdi daıarlaýdyń bilim berý baǵdarlamalaryn qaıta qaraý qajet dep sanaımyz. Sondaı-aq gıgıena, sanıtarııa, epıdemıologııa, vırýsologııa, bakterıologııa, parazıtologııa, ınfektsııalyq aýrýlar sııaqty beıindik pánderdi oqytý kólemin ulǵaıtý qajet», - dedi J. Nurmanbetova.
Onyń aıtýynsha, materıaldyq-tehnıkalyq bazanyń nasharlyǵy, joǵary tehnologııalyq jáne ınnovatsııalyq zerthanalyq jabdyqtardyń joqtyǵy, jeke qorǵanysh quraldary sanynyń jetkiliksizdigi de óz aldyna problema bolyp otyr.
«Mysaly, «Ulttyq saraptama ortalyǵynyń» jaraqtandyrylýy tek 71,6 %-dy, al zerthanalyq jabdyqtyń tozýy 65 %-dy ǵana quraıdy. Osyndaı kórsetkishterge qaraı kele, «zertteýlerdiń anyq nátıjelerin alýǵa bola ma?» degen suraq týyndaıdy Buǵan qosa, Densaýlyq saqtaý mınıstri atap ótkendeı, SES ǵımarattarynyń 80 % jáne avtokóliktiń 64 % tozyǵy jetken. Mundaı jaǵdaıda ınfektsııalyq aýrýlardyń oshaqtaryn qalaı jedel anyqtaýǵa jáne óńdeýge, epıdemııaǵa qarsy sharalardy qabyldaýǵa bolady?», - dedi depýtat.
SES-tiń ǵylymı áleýetin kúsheıtý erekshe nazar aýdarýdy talap etedi. Jańa ınfektsııalyq aýrýlarǵa arnalǵan tásilderdiń zerdelenbeýi, ǵylymı zertteýlerdiń bolmaýy, praktıka men ǵylym arasyndaǵy baılanystyń álsizdigi, jas ǵalymdardyń bolmaýy tıisti sharalar qabyldaýdy qajet etedi.
«Ol úshin ǵylymı negizdelgen tásilderdi eskere otyryp, epıdemıologııalyq ahýaldy boljaý modelin jetildirý kerek. Sondaı-aq, osy baǵyttaǵy zertteýlermen aınalysatyn jas ǵalymdardy qoldaý jónindegi sharalar qajet», - dedi ol.
Budan buryn habarlanǵandaı, Jámılá Nurmanbetova sanıtarııalyq-epıdemıologııalyq qyzmet salasyndaǵy kemshilikterdi aıtty.
