Sanepıdemıologtar qarbyzdan ýlanyp qalmaý joldaryn aıtty

Jaz bastalǵaly beri qaýyn-qarbyz turǵyndardyń jeńsik asyna aınalǵany ras.

Dúken sórelerine túsetin baqsha ónimderin departament mamandary qatań tekserýden ótkizedi eken. Mamandar tutynýshylarǵa baqsha ónimderin shildeniń ortasynan bastap satyp alýǵa keńes beredi.

«Departament qaladaǵy dúken sórelerine túsetin azyq-túliktiń sapasyn jáne qaýipsizdigin tekserip turady. Bıyl qaýiptilik kórsetkishi asyp ketken ónim tabylmady. Qaýyn men qarbyz jáne basqa da baqsha ónimderi saýdadan shyǵarylǵan joq», - dedi departament basshysynyń mindetin atqarýshy Murat Birjanov.

Onyń aıtýynsha, bıyl qaýyn qarbyz jep ýlaný jaǵdaıy tirkelmedi.

Mamandardyń aıtýynsha, adamdardyń aýyrýyna basqa da faktorlar yqpal etýi múmkin.

«Atap aıtqanda, qoldy jaqsylap jýmaý, jeke bas gıgıenasynyń talaptaryn saqtamaý aýrýǵa ákelýi yqtımal», - dedi ol.

Departament ókili tutynýshylarǵa qarbyzdy jol boıynan emes, arnaıy saýda núktelerinen satyp alýǵa keńes beredi.

«Qarbyz alar kezde onyń syrtqy túsine nazar aýdaryńyz. Pisken qarbyzdyń túsi ashyq ári qabyǵy jyltyr bolýy tıis. Murtshasy qýraǵan qarbyz pisken dep sanalady. Sondaı-aq, satyp alar kezde kesilmegen qarbyz alǵan durys. Óıtkeni jaıma bazarlarda qarbyzdy kesip berý ádetke aınalǵan. Saýdagerler pyshaqty tazalamaıdy, kir shúberekpen súrte salady. Op-ońaı aýrý juqtyrýyńyz múmkin. Atap aıtqanda, túrli mıkroorganzımderdiń kesirinen toksıkoınfektsııa bolýy ǵajap emes», - dedi Murat Birjanov.