Sanepıdemıologııa qyzmeti jurtshylyqty oryn alǵan kez kelgen jaǵdaıǵa baılanysty dárigerlerge ýaqytyly qaralýǵa úndeıdi
ASTANA. 5 tamyz. QazAqparat /Qanat Mámetqazyuly/ - Elimizdiń sanıtarlyq-epıdemıologııalyq qadaǵalaý mamandary jurtshylyq arasynda oryn alǵan kez kelgen jaǵdaılar boıynsha dárigerge ýaqytyly qaralýǵa úndeıdi.
Bul týraly búgin elimizdegi epıdemıologııalyq jaǵdaıǵa qatysty Densaýlyq saqtaý mınıstrliginde ótken baspasóz máslıhatynda Memlekettik sanıtarlyq-epıdemıologııalyq qadaǵalaý komıteti, Bas memlekettik sanıtarlyq dáriger mindetin atqarýshy Nurlan Sádýaqasov málim etti.
Bas dárigerdiń aıtýynsha, jaqynda Qyzylorda oblysynda 2006 jyly dúnıege kelgen balany ıt betinen qaýyp alǵan. Alaıda ata-anasy buǵan sonshalyqty mán bermeı, tek eki aı ótken soń ǵana medıtsınalyq kómekke júgingen eken. Sóıtse, ıt qapqan bala qutyrý aýrýyna shaldyqqany baıqalyp, oqıǵa qaıǵyly aıaqtalǵan.
Keltirgen málimetterge qaraǵanda, bıylǵy jyly el aarsynda turǵyndardyń qutyrý dertine shaldyǵý kórsetkishteri de birshama tómendegen. Máselen, elimiz boıynsha 2009 jyly 14 jaǵdaı, 2010 jyly 6 jaǵdaı, aǵymdaǵy jyly 4 jaǵdaı tirkelgen. «Bul oqıǵalardyń basym bóligi negizinen dárigerlerge ýaqytyly qaralmaǵandyqtan bolyp otyr», - deıdi N. Sádýaqasov.
