Sanepıd jaǵdaıdy qadaǵalaý úshin BQO-ǵa Qazaqstannyń Bas memlekettik sanıtarlyq dárigeri jetti
ASTANA. 14 sáýir. QazAqparat - Kóktemgi sý tasqynynan zardap shegip jatqan eldi mekenderdegi sanıtarlyq-epıdemıologııalyq jaǵdaıdy qadaǵalaý úshin Batys Qazaqstan oblysyna Qazaqstannyń Bas memlekettik sanıtarlyq dárigeri Keńes Ospanov attandy.
Densaýlyq saqtaý mınıstrliginen málim etkendeı, osy ýaqytqa deıin BQO-nyń sý astynda qalǵan eldi mekenderinde ınfektsııalyq aýrýlardy juqtyrý oqıǵalary tirkelgen joq.
«Aýyz sýdyń sapasyn zerthanalyq baqylaý kúsheıtilip, sýdyń synamalaryn alý arqyly kúndelikti baqylaý júrgizilýde. Barlyq balalar uıymdarynda, mektepke deıingi, jalpy bilim berý mekemelerinde, orta, joǵary oqý oryndarynda sondaı-aq, sý basqan úılerinen kóshirilgen oblys turǵyndarynyń ornalasqan jerlerinde tamaqtandyrý jáne aýyzsý rejımin uıymdastyrý boıynsha baqylaý júzege asyrylýda», - dep atap ótken vedomstvonyń baspasóz qyzmeti.
Sondaı-aq, eldi mekender men sý qoımalaryna jaqyn ornalasqan óndiristik nysandarda sanıtarııalyq-gıgıenalyq jáne epıdemııaǵa qarsy baqylaý kúsheıtildi. Túrli juqpalardyń aldyn alý úshin halyq arasynda sanıtarlyq aǵartý jumystary júrgizile bastady. Memlekettik sanepıdqadaǵalaý komıtetiniń Batys Qazaqstan oblysy boıynsha aýmaqtyq bólimsheleri táýlik boıǵy jumys tártibine aýystyryldy.
