Sandyqtaýlyqtarǵa 10 tonnadan astam gýmanıtarlyq kómek jetkizildi
Balkashıno aýylynyń aýdandyq Mádenıet úıinde azyq-túlik pen qajetti buıymdar jınaý pýnkti jumys istep tur, júzden astam otbasyǵa kómek kórsetildi, dep habarlaıdy Aqmola oblysy ishki saıasat basqarmasy, aımaqtyq kommýnıkatsııalar qyzmeti aýdan ákiminiń baspasóz qyzmetine silteme jasap.
Qaıyrymdylyq aktsııasyna Aqmoladaǵy Qazaqstan halqy Assambleıasy, Qazaqstan Respýblıkasynyń Qyzyl Jarty Aı qoǵamynyń fılıaly (Astana qalasy), «Kókshetaý mıneraldy sýlar» kompanııasy, Aqmola Kásipkerler palatasy janyndaǵy Іsker áıelder keńesi, Qazaqstan musylmandary dinı basqarmasy (Astana qalasy), Halyq banki (Kókshetaý qalasy), Esil aýdanynyń, Sandyqtaý aýdanynyń memlekettik jáne kommertsııalyq mekemeleri, QR Parlamenti Májilisiniń «Halyq kommýnısteri» fraktsııasy, «Jasyl el - Group» JShS, «Kókshetaý-Trans-Gaz» JShS jáne elimizdiń meıirban azamattary qoldaý kórsetti.
Atalǵan uıymdar zardap shekken halyqqa azyq-túlik (un, jarma, tuz, kondıterlik ónimder, kúnbaǵys maıy men sary maı, qant, sháı, makaron ónimderi, kókónister), kıim-keshek pen aıaq kıim, gaz, tósek jabdyqtary (jastyq, matras, jamylǵylar), jýǵysh zattar men gıgıena zattary, sý jetkizildi.
Eske sala ketsek, 2017 jyldyń 16 sáýirinde aýdandaǵy Jabaı ózeninde sý deńgeıi kóterilip, 327 úıdi basty. 827 turǵyn aýdandyq orta mektepke jáne týystaryna evakýatsııalandy.
