Sandyqtaýda 4 mlrd teńgeniń ınvestıtsııalyq jobalary júzege asyp jatyr

KÓKShETAÝ. QazAqparat – Aqmola oblysynyń Sandyqtaý aýdanynda jekemenshik kapıtaldyń esebinen jalpy quny 4 mlrd teńge bolatyn 13 ınvestıtsııalyq joba júzege asyp jatyr. Bul jobalar negizinen aýyl sharýashylyǵyn ártaraptandyrý, tyńdaıtqysh óndirý, sút jáne etti baǵyttaǵy mal sharýashylyǵyn damytýǵa baǵyttalǵan, dep habarlaıdy QazAqparat tilshisi.

Sandyqtaý aýdany ákimi Erbol Júsipbekovtiń málimetinshe, ekonomıkasy damyǵan irgeli óńirlerdiń biri sanalatyn Sandyqtaý aýdanynda óndiris jyldan-jylǵa ósip, órkendep keledi.

Negizinen agrarlyq óńir sanalatyn aýdanda eginshilikpen birge mal sharýashylyǵy da qarqyndy damýda.

«Qazirgi kúnge deıin aýdan 2 mlrd 422 mln teńgeniń aýyl sharýashylyǵy ónimin óndirdi. Naqty kólem ındeksi 101,7 paıyzdy qurady. Bul ótken jyldyń sáıkes kezeńimen salystyrǵanda 372 mln teńgege artyq. Aýdan aýmaǵyndaǵy aýyl sharýashylyǵy jerleriniń kólemi 478 myń 335 gektardy quraıdy. Onyń ishinde egistik jerler 398 myń 802 gektar bolsa, 77 myń 214 gektar jaıylym jáne 1 myń 21 gektar shabyndyq, oǵan qosa 72 gektar kóp jyldyq ekpe shóp alqaby bar. Aýdanda eginshilikpen birge mal sharýashylyǵy salasy da jaqsy damyp keledi. Bıylǵy jyldyń birinshi toqsanynda 2 myń 368,7 tonna et, 11 myń 758,8 tonna sút jáne 2 mln 112 myń dana jumyrtqa óndirildi», - deıdi Erbol Júsipbekov.

Qazirgi kúni negizgi kapıtalǵa salynǵan ınvestıtsııa kólemi 5 mlrd 293 mln teńgeni qurady. Naqty ındeks kólemi - 122,5 paıyz.

Aldaǵy ýaqytta jekemenshik kapıtaldyń esebinen jalpy quny 4 mlrd teńge bolatyn 13 ınvestıtsııalyq joba júzege asyrylmaq.

Bunyń ózi qosymsha 85 jumys ornyn ashýǵa múmkindik jasaıdy.

«Osy ınvestıtsııalyq jobalardyń ishinde quny 1 mlrd teńge bolatyn «Svobodnoe» seriktestiginiń «Eginshilikti qoldan sýǵarý arqyly ártaraptandyrý» jobasy bıylǵy jyldyń qyrkúıek aıynda iske qosylmaq. «Agro Shans» seriktestiginiń «Aýyl sharýashylyǵy maqsatyndaǵy óndiristik bazany salý» jobasy bıylǵy jyldyń qazan aıynda iske qosylady dep josparlanǵan. Bul jobanyń quny 300 mln teńge. Al, «Baıdaly 2» seriktestiginiń «Taýarly sút fermasyn 300 basqa deıin ulǵaıtý» jáne «2 astyq qoımasyn salý» jobalary da qazan aıynda iske qosylady. Buǵan qosa, osy seriktestikte «suıyq tyńaıtqysh óndiretin tseh qurylysyn salý» jobasyn qyrkúıek aıynda iske qosý kózdelgen», - dep qosty Erbol Júsipbekov. Aýdan ákimi atap ótkendeı, sonymen birge, «Maksımovskoe» JShS-iniń «Suıyq tyńaıtqysh daıyndaý tsehy qurylysy» jobasy, «Spasskoe» JShS-iniń «Et fermasyn 300 basqa deıin ulǵaıtý» jobasy, «Agro Laık» seriktestiginiń «Tuqym jelisi» jobasy, «Bastaý Agro S» seriktestiginiń «Et fermasyn 900 basqa deıin ulǵaıtý» jobalary da bıylǵy jyldyń sońyna deıin júzege asyrylmaqshy.

Aıta ketsek, budan buryn Atbasarda birqatar ınvestjoba iske asyrylyp jatqanyn jazǵan edik.