Sandyq televızııa aqparattyq kontentti keńeıtedi
ASTANA. 5 shilde. QazAqparat - Qazaqstanda engizile bastaǵan sandyq televızııa televıdenıeniń sapasyn jaqsartyp qana qoımaıdy, elimizdiń aqparattyq kontentin keńeıtedi, dep habarlady «Qazmedıaortalyq» basqarýshy kompanııasynyń tehnıkalyq dırektory Vladıslav Bogýsevıch pm.kz saıtyna bergen suhbatynda.
Qazaqstanda sandyq telehabar taratý júıesi qolǵa alynyp otyr jáne osy jańa júıeniń arqasynda elimiz 2015 jylǵa qaraı balama televıdenıeden sandyq televıdenıege aýysady dep paıymdalýda. Bul jańalyq Qazaqstannyń barlyq eldi mekenderiniń turǵyndaryna otandyq óndiristiń kóp telebaǵdarlamalaryn kórýge múmkindik beredi.
V.Bogýsevıch sondaı-aq, televızııalyq setkanyń, qoldanystaǵy arnalardan basqa birneshe jańa taqyryptyq arnamen tolyǵatynyn aıtyp ótti.
«Bizdiń aqparattyq keńistigimizdegi qazirgi qoldanystaǵy arnalarmen qatar, taǵy birneshe qosymsha arnany iske qosý josparlanýda jáne ol jobalarmen «Habar» jáne «Qazaqstan» telekompanııalary aınalysatyn bolady», - dedi V.Bogýsevıch.
Sandyq televızııa paketine «Mádenıet» jáne «Bilim» arnalary, sondaı-aq táýlik boıy jumys isteıtin «24.kz» arnasy engiziletin bolady.
