Sandyq tahograftardy engizý máseleleri talqylandy
ASTANA. Qarashanyń 26-sy. QazAqparat. Qarashanyń 26-da Qazaqstan Respýblıkasy Kólik jáne kommýnıkatsııa mınıstrliginde Halyqaralyq avtokólik odaǵy akademııasy sarapshylarynyń qatysýymen «Sandyq tahograftar» taqyrybyna semınar ótti.
Semınardyń uıymdastyrýshysy - Kóliktik baqylaý komıteti jáne Saýdany yryqtandyrý jáne kedendik reforma boıynsha USAID óńirlik jobasy, dep habarlaıdy KKM baspasóz qyzmeti.
Búgingi tańda Qazaqstanda Eýropalyq Odaq memleketterimen avtomobıl tasymaly boıynsha 5,2 myń avtokólik quraly qamtylǵan. Jyl saıyn tasymaldanatyn júktiń kólemi 1,7 mln. tonnany qurap otyr. Osyǵan oraı respýblıkada Halyqaralyq avtomobıl tasymalyn júzege asyratyn kólik quraldary ekıpajynyń jumysy jónindegi Eýropalyq kelisimge qosylý boıynsha belsendi jumys júrgizilip jatyr. Osy Kelisimniń negizgi sharttarynyń biri 2010 jyldyń 16 maýsymyna deıin sandyq tahograftardy engizý bolyp tabylady. Óz kezeginde bul Eýropalyq kelisim erejelerine sáıkes Qazaqstan Respýblıkasynyń ulttyq zańdaryna ózgerister engizýdi qajet etedi.
Osyǵan oraı QR Parlamenti Májilisine engizilgen zań jobasynda «Avtomobıl kóligi týraly» Zańyna túzetýler engizý qarastyrylǵan, atap aıtar bolsaq, sandyq tahograftardy qoldaný tártibin retteıtin 9-1-babymen tolyqtyryldy.
Osylaısha respýblıkaishilik tasymaldaýlar boıynsha sandyq tahograftardy qoldanýy mindetti qatynastar túri ulǵaıyp keledi. Munda qoldanystaǵy tahograftardy da, sandyq tahograftardy da paıdalaný ruqsat etiledi. Sebebi Qazaqstanda qazirgi kezde qazirgi qoldanystaǵy tahograftardy sandyq tahograftarǵa aýystyrý tasymaldaýshylardy úlken shyǵynǵa ushyratady.
Anyqtama: Sandyq tahograftardyń artyqshylyǵy - qozǵalys jyldamdyǵyn, júrip ótken joldy jáne júrgizýshilerdiń demalys jáne eńbek rejımin úzdiksiz tirkeýi bolyp tabylady. Kórsetilgen qurylǵy jol qozǵalysynyń qaýipsizdigin qamtamasyz etýge arnalǵan, qalaaralyq jáne halyqaralyq tasymaldaýda oryn alatyn apattyń basty sebebi júrgizýshiniń sharshaýyna nemese kóliktiń osy tıpine ruqsat etilgen júrý jyldamdyǵyn shekten asyrýǵa baılanysty.
Sandyq tahograftyń qazirgi qoldanystaǵy tahograftan aıyrmashylyǵy - aqparatty bir jyl boıy saqtaı alatyn energııalyq táýelsiz jadysynyń bar bolýy jáne jadyǵa jazylǵan málimetterge zańsyz qol suǵýdan saqtaıtyn qorǵanyshynyń artyqshylyǵynda. Tahograftyń kórsetkishi sotta jáne joldaǵy kóliktik baqylaý kezinde zańdy dep tanylady. Sondaı-aq tahograf arqyly alynǵan qujat Eýropalyq kelisimge qatysýshy memleketterdiń quqyq qorǵaý organdarynyń aıyppul salýyna negiz bolyp tabylady. Búgingi kúni EO memleketterinde óndiriletin avtokólik quraldary zaýyttan tek sandyq tahograftarmen shyǵarylady.
Qazirgi kezde Qazaqstanda sandyq tahograftar júıesin, qyzmet kórsetý sheberhanalary jelisin, emıssııa kartochkalarynyń júıesin, ulttyq bazany engizý, barlyq tasymaldaý úrdisine qatysýshylardy, onyń ishinde júrgizýshilerdi, masterlerdi, ınspektorlardy, ákimgerlerdi oqytý daıyndyǵy júrgizilýde.
Ótken semınarda problemalyq máseleler qaralyp, qyzmettiń negizgi basymdyqtary anyqtaldy.
