Sandyq bilim berý resýrstaryn daıyndaýǵa baǵyttalǵan 1 mlrd. teńge «jelge ushýy» múmkin - R. Kenjehanuly
ASTANA. 19 qarasha. QazAqparat - Sandyq bilim berý resýrstaryn daıyndaýǵa baǵyttalǵan 1 mlrd. teńge «jelge ushýy» múmkin. Bul týraly búgin Májilistegi Áleýmettik-mádenı damý komıtetiniń keńeıtilgen otyrysynda «Bilim Media Group» kompanııasynyń basshysy Raýan Kenjehanuly málim etti. Eske salaıyq, komıtet otyrysyna depýtat Darıǵa Nazarbaeva jetekshilik etken bolatyn.
R. Kenjehanulynyń aıtýynsha, aǵymdaǵy jyldyń sońyna deıin elimizde 7 myńnan astam sandyq bilim berý resýrstary ázirlenýi tıis bolatyn. Atalmysh baǵyttaǵy jobalardyń tikeleı tapsyrys berýshisi «Ulttyq aqparattyq tehnologııalar» AQ bolyp tabylady. Bul rette atalmysh kompanııa Bilim jáne ǵylym mınıstrliginiń tapsyrysy boıynsha jobanyń operatory retinde belgilenip otyr. «Alaıda, aǵymdaǵy jyly jobaǵa bólingen qarajatty qysqartý jónindegi josparǵa baılanysty qoldanystaǵy kelisim boıynsha kontent ázirleý jumystaryn aıaqtaýǵa qaýip tónip tur. Merdigerler tapsyrys somasynan tek 30 paıyz mólsherde ǵana avanstyq tólemder alyp keledi. Avanstyq tólemge sáıkes jumystardy ishinara qabyldaǵan jaǵdaıda ár pán boıynsha taqyryptyń tek bir bóligi ǵana jabylady. Al bul jobanyń maqsaty men mánin joǵaltady. Nátıjesinde shamamen 1 mlrd teńge bosqa ketedi», - deıdi R. Kenjehanuly.
Onyń sózine qaraǵanda, kelisimniń osylaısha buzylýy nemese talaptardyń oryndalýynan negizsiz bas tartý ondaǵan sot isine jáne jobaǵa qatysý úshin kóp mólsherde qaryzǵa qarajat alǵan birqatar uıymdardyń «taqyrǵa otyrýyna» ákep soǵýy yqtımal. «Jalpy jobany ázirleýge qatysqan qazaqstandyq kompanııalarda 500-den astam bilikti mamandar jumys isteıdi», - deıdi R. Kenjehanuly.
