Sandyqta saqtalǵan jádiger: Jumat Shanınniń shekpeni Pavlodar mýzeıine berildi

PAVLODAR. KAZINFORM — Qazaqtyń tuńǵysh kásibı teatr rejısseri, Alash qaıratkeri Jumat Shanınniń uzaq jyldar boıy urpaqtarynyń qolynda saqtalǵan túıe jún shekpeni týǵan ólkesine oraldy. Qundy jádigerdi qaıratkerdiń nemeresi Bolat Shanın Buqar jyraý atyndaǵy ádebıet jáne óner mýzeıine tabystady.

Sandyqta saqtalǵan jádiger: Jumat Shanınniń shekpeni Pavlodar mýzeıine berildi
Foto: Buqar jyraý atyndaǵy ádebıet jáne óner mýzeıi

Alash ardaqtysynyń kózi tirisinde kıgen shekpeni ondaǵan jyl boıy týystarynyń sandyǵynda saqtalǵan. Sırek jádigerdi 2017 jyly belgili aqyn, Ekibastuz qalalyq «Otarqa» gazetiniń redaktory Janargúl Qadyrova izdestirip júrip tapqan.

Jádiger Jumat Shanınniń týǵan aýylynyń irgesindegi Jarylǵap bólimshesinde turatyn Baltabaı Kábıraulynyń úıinde saqtalyp kelgen. Jergilikti jurt bul shańyraqty «Shananyń qarashańyraǵy» dep ataıdy. Baltabaı aqsaqal — Shana atanyń týǵan shóberesi.

Janargúl Qadyrova shekpenniń qalaı saqtalyp qalǵanyn da aıtyp berdi.

— Qurbym Pákızat Baltabaı aǵanyń qyzy. Birde Alash ardaqtysynan qalǵan zat bar ma dep suraǵanymda, osy shekpen júk arasynan shyǵa kelmesi bar ma! «Atam Nursheke — Shananyń bes ulynyń kenjesi. Al shekpendi Mustafanyń (ol da Shananyń uly) balasy Beısenbaı marqum Jumattiki dep maǵan bergen» degen edi Baltabaı ata, — deıdi ol.

Sandyqta saqtalǵan jádiger: Jumat Shanınniń shekpeni Pavlodar mýzeıine berildi
Foto: Buqar jyraý atyndaǵy ádebıet jáne óner mýzeıi

Jumat Shanınniń 100 jyldyq mereıtoıy týǵan jerinde atalyp ótken kezde qaıratkerdiń nemeresi Bolat Shanın atasynan qalǵan shekpendi alǵash kórip, erekshe tolqyǵan. Tipti ony kıip, atasyna degen saǵynyshyn basqan. Keıinnen jádigerdi Almatyǵa alyp ketken. Sodan beri otbasylyq mura retinde saqtalyp kelgen shekpen endi tarıhı otanyna oraldy.

Buqar jyraý atyndaǵy ádebıet jáne óner mýzeıiniń qyzmetkerleri Almatyǵa arnaıy baryp, jádigerdi Ertis-Baıan óńirine jetkizdi. Mýzeı basshysy Erbol Qaıyrovtyń aıtýynsha, túıe júninen tigilgen shekpenniń bastapqy qalpy jaqsy saqtalǵan.

— Mýzeıimizdiń qory qundy jádigermen tolyqty. Alash qaıratkeri, kásibı qazaq teatrynyń negizin qalaýshy, akter, rejısser Jumat Shanınniń nemeresi Bolat Shanın atasynyń túıe júninen tigilgen shekpenin tabystap, mádenı muraǵa degen adaldyǵyn tanytty. Jumat atamyzdyń teri sińgen jádigerdiń óńi buzylmaǵan, sol zamanǵy mánerde tigilgen. Jádiger mýzeıge kelýshilerdiń qyzyǵýshylyǵyn arttyryp, zertteýshiler úshin úlken olja bolatyny anyq, — dedi Erbol Qaıyrov.

Osylaısha, talaı jyl otbasylyq jádiger retinde saqtalǵan tarıhı shekpen endi kópshilik nazaryna usynylyp, Jumat Shanınniń ómiri men shyǵarmashylyǵyn zertteýge múmkindik bermek.

Buǵan deıin Pavlodarda Janbıke Shanınanyń portreti saqtalyp turǵanyn jazǵanbyz. 

Sondaı-aq jaqynda Pavlodar óńiriniń týmasy, dáýlesker kúıshi Rústembek Omarovtyń nemis tutqynynda túsirilgen fotosýreti tabyldy. 

Foto — Buqar jyraý atyndaǵy ádebıet jáne óner mýzeıi