Sanaıǵaq: Astana turǵyndary qansha et pen nan tutynady
ASTANA. QazAqparat - Jyl saıyn Astana on myńdaǵan turǵynǵa kóbeıedi. Sáıkesinshe, azyq-túlik, sý, elektr energııasyn tutyný kólemi de artyp keledi, dep habarlaıdy «QazAqparat» HAA tilshisi.
Statıstıka departamenti usynǵan derekterge sáıkes, 1999 jyly halyqqa 17 mıllıon 80 myń tekshe metr sý jiberilgen. 2016 jyly bul tsıfrdyń eselep óskeni baıqalady - 44 mıllıon 152 myń tekshe metr.
Energııany tutyný kórsetkishi de sońǵy jyldary eki esege artqan: 1999 jyly 1 110 mıllıon kılovatt-saǵattan astam bolsa, 2015 jyly 2 888 mıllıon kılovatt-saǵatqa jetken.
Statıstıka departamenti nan men nan-toqash ónimderiniń bólshek saýdasyn 2004 jyldan beri baqylap keledi. 2004 jyly 7,5 myń tonna ónim tutynylsa, 2005, 2006, 2007 jyldary Astana dúkenderinen 9 myń tonna nan men nan-toqash ónimderi satylǵan. Al 2008 jyly onyń kólemi kúrt ósken - bir jylda 67 myń tonna, eń úlken kórsetkish 2009 jyly tirkeldi - jylyna 86 myń tonna.
Et pen et ónimderiniń bólshek saýdasy týraly derekter 2002 jyldan beri baqylanady. Bul jyly 11 myń tonna et satylǵan. Al 2015 jyly bul tsıfra 22 myń tonnany qurady.
Kommýnaldy qaldyqtardyń kólemi boıynsha derek jınaýdy statıstıka organy 2005 jyly ǵana qolǵa alǵan. 2005 jyly astanalyqtar 224 myń tonna qoqys shyǵarsa, ótken jyly 383 myń tonna laqtyrǵan.
