Sanavıatsııa qyzmeti Úrjardan Semeıge 30 ret aýyr haldegi patsıentterdi jetkizgen
ÚRJAR. QazAqparat - Shyǵys Qazaqstan oblysy Semeı qalasy sanıtarlyq avıatsııa qyzmetiniń byltyrǵy jyly Úrjar aýdanyna shuǵyl kómek qajet patsıentterge 30 ret kómekke shyqqan.
Bul týraly atalǵan qyzmettiń jumysymen tanysý barysynda málim boldy, dep habarlaıdy QazAqparattyń Úrjar aýdanyndaǵy tilshisi.
Shyǵys Qazaqstan oblysynyń Úrjar aýdany oblys ortalyǵynan 550 shaqyrym qashyqta jatyr. Apat aıtyp kelmeıdi. Oqys oqıǵa bola qalsa, aýyr halge ushyraǵan adamdarǵa medıtsınalyq kómek kerek bolǵanda ár sekýndtyń qymbat ekendigi ras. Osyndaı kúrdeli jaǵdaıda óńir halqyn medıtsınalyq qyzmetpen qamtamasyz etý Semeı qalasynyń sanıtarlyq avıatsııa qyzmetiniń basty mindeti bolyp otyr.
Aıta keterligi, byltyrǵy jyly sanıtarlyq avıatsııa qyzmeti Úrjar ortalyq aýdandyq aýrýhanasynan aýyr haldegi patsıentterdi oblys ortalyǵyna jetkizýge 30 ushyrylym jasaǵan eken. Onyń ishinde 75 paıyzy júkti áıelderge qatysty.
Taıaýda Úrjarǵa anestezıolog-reanımatolog dáriger Ásem Káribaeva men sanavıtsııa qyzmetiniń feldsheri Nazym Sarbıeva naýqastardy alyp ketýge keldi. Olar syrqattardy tekserip, qazirgi jaǵdaıymen tanysyp, jergilikti dárigerlermen aqyldasty. Nazym Sarbıevanyń osy salada júrgenine 23 jyl bolǵan. Al Ásem Erqanatqyzynyń jumys ótili 10 jyl.
Jalpy, Semeı qalasynyń sanavıatsııa qyzmeti 2014 jyldan bastap jumys isteýde. Munda dárigerlerdiń barlyǵy da óz mamandyǵynyń sheberleri, qandaı jaǵdaıda da durys sheshim qabyldaı alatyn mamandar. Sondaı-aq, munda qajet bolǵan kezde qalanyń barlyq deńgeıdegi emdeý mekemelerinen bilikti dárigerlerdi de shaqyrta alady. Olardyń kezekshilik kestesi aldyn ala bekitilgen.
Atalmysh sanıtarlyq avıatsııa mamandarynyń jumys nátıjeliligin arttyrý, jetýi qıyn jerlerdegi azamattarǵa shuǵyl medıtsınalyq kómek kórsetý maqsatynda «Taraz Jańa Álem» kompanııasynan AN-2 ushaǵy berilgen. Munda balalardy, ásirese, shala týǵan sábılerdi alyp júrýge qolaıly jaǵdaı jasalǵan, ushaqta reanımatsııalyq ústel, medıtsınalyq quraldar ústeli bar.
Ekıpaj 5 adamnan turady. 2 dáriger, 2 ushqysh, 1 avıatehnık. An-2 ushaǵyn basqaratyn Tahır Ýtegenovtyń 34 jyldyq eńbek ótili bar. «Bilikti ushqysh qandaı aýa raıy bolsa da, áýege erkin kóterile bilýi tıis. Ásirese túnde jáne taýly aımaqtarda qıyn» deıdi ol.
Sanıtarlyq avıatsııa qyzmetiniń jumysy aýyr ekendigi aıtpasa da túsinikti. Aýa raıynyń qolaısyzdyǵyna, baratyn jerdiń qashyqtyǵyna qaramastan shaqyrtýǵa jyldam ushyp, alǵashqy medıtsınalyq kómek kórsetýge qashanda saqadaı saı.
