Sanavıatsııa qaýipsizdigin arttyrýǵa baǵyttalǵan birqatar usynystar ázirlenýde - mınıstr
Onyń aıtýynsha, sanıtarlyq avıatsııa kún saıyn ortasha eseppen 6 márte ushýlardy oryndaıdy.
«Bul kúndelikti jumys. Sonyń arqasynda myńdaǵan ómir saqtalyp qalýda. Degenmen, ókinishke qaraı, tehnıkalyq táýekelder de bar. Olar bizdiń mınıstrliktiń qaraýynda emes desek te bolady. Biraq, aldyn alý, boldyrmaý úshin tasymaldaýshylarǵa talapty kúsheıtetin bolamyz. Osyǵan baılanysty komıssııa tasymaldaýshylardyń qaýipsizdigin arttyrý jóninde Úkimet pen basqa da memlekettik organdar úshin birqatar usynys ázirleýde», - dedi Eljan Birtanov.
Onyń sózine qaraǵanda, búgingi kúni elimizde aýyldy eldi mekenderdiń janyna qonyp, naýqasty oblys ortalyǵyna jetkizýge múmkindigi bar ushaqtardyń jetispeýshiligi anyq baıqalyp otyr.
«Muny AN-2 ushaǵy ǵana oryndaı alady. Bul ushaqtar negizinen jetkilikti de. Olar kúndelik ushyp, ózderin jaqsy qyrlarynan kórsetýde», - dedi ol.
Sonymen qatar, ol apatqa ushyraǵan AN-28 ushaǵyndaǵy dárigerler bara jatqan júkti áıelge qatysty derektermen bólisti.
«Ókinishke qaraı, áıel kóz jumdy. Biz tergeý júrgizdik. Óte joǵary deńgeıdegi mamandardy qajet etken óte aýyr jaǵdaı bolǵany sózsiz. Óńirlik jergilikti dárigerlerdiń osyndaı aýyr jaıttarǵa qatysty ómirlik tájirıbeleri jetispeı jatady. Bul jaǵdaıda ushaq ushqanǵa deıin de, odan keıin de onlaın keńester júrgizildi. Ol áıel kúni-túni akýsherlik, gınekologııa jáne ishki aýrýlar kardıologııasy ınstıtýtynyń mamandary tarapynan baqylaýda boldy», - dedi Birtanov.
Esterińizge salsaq, 2017 jyldyń 3 qazanynda 19 saǵat 15 mınýtta Almaty oblysy Іle aýdanynyń Mejdýrechınsk aýyly mańynda sanıtarlyq avıatsııa reısin oryndaǵan An-28 ushaǵy qulap, órtengen. Bortta bolǵan 5 adam qaza tapqan.