Sanavıatsııa ınfarkt alǵan qazaqstandyqty Úrimjiden Astanaǵa jetkizdi
ASTANA. QazAqparat - Birer saǵat buryn Astanaǵa Úrimjiden bortynda aýyr haldegi jerlesimiz bar Respýblıkalyq sanıtarlyq avıatsııa ortalyǵynyń ushaǵy kelip jetti.
Bul týraly QR SІM baspasóz qyzmetiniń jetekshisi Ánýar Jaınaqov Feısbýktegi paraqshasynda jazdy. Ol Densaýlyq saqtaý mınıstrligi men Respýblıkalyq sanıtarlyq avıatsııa ortalyǵyna shuǵyl kómegi úshin alǵys aıtty.
«21 mamyr kúni Qytaıǵa iskerlik saparmen barǵan top quramyndaǵy
1972 jylǵy qaraǵandylyq Amanqos esimdi Qazaqstan azamaty mı ınfarktyn alyp, qala aýrýhanalarynyń birine jetkizilgen. Aýrýhanada azamat es-tússiz jatqan. Bul týraly aqparat Úrimjidegi QR Syrtqy ister mınıstrliginiń pasporttyq-vızalyq qyzmetine jetkizildi.
Qazaqstandyq konsýl qyzmetkerleri otandasymyzdyń týysqandarymen baılanysyp, aýrýhanadan qajetti anyqtamalyqtar alǵyzyp, Qazaqstandaǵy Qytaı elshiligindegi áriptesterine qaraǵandylyqtyń eki aǵasyna Úrimjige jetý úshin jedel vıza rásimdelýine yqpal etýlerin ótindi», - dep jazdy ol. Vıza rásimdeýge birneshe saǵat ýaqyt ketken.
Bir apta ýaqyt ótip, Amanqos esin jıǵannan keıin ony Qazaqstanǵa jetkizý máselesi qarastyryldy. Alaıda, birde-bir áýe kompanııasy bortta aýyr haldegi jolaýshyny alyp júrýge kelisim bermedi, al qytaılyq dárigerler naýqasty avtokólikpen tasymaldaýǵa bolmaıtyndyǵyn aıtty.
«Sońynda QR Syrtqy ister mınıstrligi Densaýlyq saqtaý mınıstrligimen keńese kele Úrimjige arnaıy sanıtarlyq avıatsııa bortyn jiberý týraly sheshim qabyldady. Nátıjesinde búgin tańerteń Úrimji áýejaıynda QR SІM pasporttyq-vızalyq qyzmeti Amanqosty aǵasy jáne qazaqstandyq bilikti dárigerlermen birge Astanaǵa shyǵaryp saldy.
Respýblıkalyq sanıtarlyq avıatsııa ortalyǵy ushaǵy saǵat 12.30-da Astanaǵa qondy. Qaraǵandylyq azamat ary qaraı emin jalǵastyrý úshin №1 qalalyq aýrýhananyń jan saqtaý bólimshesine jetkizildi. Dárigerler onyń jaǵdaıyn aýyr ári turaqty dep baǵalap otyr», - dep jazdy Ánýar Jaınaqov.
