Sanavıatsııa aýyr syrqatqa shaldyqqan qazaqstandyqty elge jetkizdi
ASTANA. QazAqparat - Qazaqstannyń Polshadaǵy elshiligi QR Densaýlyq saqtaý mınıstrliginiń respýblıkalyq sanıtarlyq avıatsııa ortalyǵymen birlese otyryp, týberkýlezdiń sırek túrine shaldyqqan qazaqstandyq 18 jastaǵy boıjetkendi Varshavadan Astanaǵa arnaıy bortpen alyp keldi, dep habarlaıdy «QazAqparat» HAA tilshisi.
Bul týraly QR Syrtqy ister mınıstrliginiń baspasóz qyzmetiniń jetekshisi Ánýar Jaınaqov Feısbýktegi paraqshasynda málim etti. Onyń jazýynsha, jyl basynan beri Qazaqstannyń sanıtarlyq avıatsııasy men elshilikteriniń arqasynda úsh qazaqstandyq úshin arnaıy ushaq jiberilgen.
«Aqpan aıynda Qyzylorda oblysynyń turǵyny, Semeı qalasyndaǵy ýnıversıtetteriniń birinde birinshi kýrs oqıtyn Aıaýlym (etıkaǵa baılanysty esimi ózgertildi) Polshanyń Belostok qalasyna qysqa merzimdi oqý kýrsyna kelgen. Oqýdy aıaqtaýyna bir aı merzim qalǵanda oǵan sýyq tıip, boıjetken ótkir pnevmonııamen aýrýhanaǵa túsken. Nátıjesiz em-domnan keıin polshalyq dárigerler Varshavada jiti medıtsınalyq zertteý júrgizip, Aıaýlym óte sırek kezdesetin týberkýlezdiń ashyq túrine shaldyqqanyn anyqtaǵan. Keıin boıjetkenniń bul aýrýdy Qazaqstanda júrip juqtyrǵany belgili bolǵan», - dep jazady Ánýar Jaınaqov.
Dıagnoz anyqtalǵannan keıin boıjetkenniń polshalyq ýnıversıttegi kýratory bul jaǵdaı týrasynda Qazaqstannyń Polshadaǵy elshiligine habar bergen. Qazaqstandyq dıplomattar klınıkanyń basshylyǵymen baılanysyp, Aıaýlymnyń týǵan-týystaryna habar bergen.
«Uzaq ýaqyt boıy júrgizilgen em-dom men preparattar ókinishke oraı, eshqandaı nátıje bergen joq. Osydan keıin aýrýhananyń dárigerleri emdi Qazaqstanda júrgizýge keńes berdi. Infektsııalyq aýrýdyń qaýpin eskere kele Qazaqstanǵa saparlaıtyn kez kelgen kóliktiń túrimen barý aınaladaǵy halyqqa qaýip týdyratyn edi. Osy sebepti, Qazaqstan elshiligi QR Densaýlyq saqtaý mınıstrliginiń respýblıkalyq sanıtarlyq avıatsııa ortalyǵymen kelissóz júrgize bastady», - delingen jazbada.
Osynyń nátıjesinde, 8 tamyz kúni saǵat 21:30 shamasynda Aıaýlym arnaıy bortpen Astanaǵa jetkizilgen. Em-dom barysynda Polshada qazaqstandyq dıplomattar Aıaýlymmen baılanysty úzbeı, Belostoktaǵy klınıkaǵa baryp, jaǵdaıyn bilip turǵan. Dárigerlermen kúndelikti telefon arqyly sóılesip, onyń jaǵdaıyn nazardan tys qaldyrmaǵan.
«Boıjetkenge polshalyq ýnıversıtettiń muǵalimderi de qoldaý bildirdi. Otandasymyzdyń tezirek jazylyp ketýin tileımiz», - dep jazady Ánýar Jaınaqov.
