Sanatáli Tóltaev WBC gran-prı týrnırinde alǵashqy jeńisine qol jetkizdi

ASTANA.KAZINFORM - Birinshi orta salmaqtaǵy qazaqstandyq boksshy Sanatáli Tóltaev (3-0,2KO) kásipqoı mansabynda úshinshi jekpe-jegin ótkizdi.

Otandasymyz Saýd Arabııasynyń astanasy Er-Rııad qalasynda ótip jatqan Dúnıejúzilik boks keńesiniń (WBC) «The Riyadh Season WBC Boxing Grand Prix» týrnırinde sharshy alańǵa shyǵyp, venesýelalyq boksshy German Brocheromen (10-1,10KO) qolǵap túıistirdi.

Nátıjesinde qazaqstandyq boksshy qarsylasyn 6-raýndtyń sońǵy mınýtynda tehnıkalyq nokaýtpen jeńdi. Osylaısha, Sanatáli Tóltaev kásipqoı boksta úshinshi ret jeńiske jetýmen qatar, WBC gran-prı týrnıriniń ekinshi kezeńine ótti.

Taǵy bir qazaqstandyq boksshy Nurjan Serikbev (5-1, 5KO) ıtalııalyq Florens Prıoloǵa (10-0, 5KO) tóreshiler sheshimimen ese jiberdi.

Eske salaıyq, «The RiyadhSeason WBC Boxing Grand Prix» týrnıri Saýd Arabııasynyń astanasy Er-Rııad qalasynda 17 sáýirde bastalyp, 20 jeltoqsanda máresine jetedi. Alǵashqy kezeń 17-20 sáýir aralyǵynda ótedi dep josparlanyp otyr.

Buǵan deıin habarlaǵanymyzdaı, gran-prı jeńil salmaq, birinshi orta salmaq, orta jáne aýyr salmaq syndy 4 salmaq kategorııasy boıynsha ótedi. Oǵan álemniń 41 elinen kelgen 128 boksshy qatysady dep josparlanyp otyr.

Aıta keterligi, qatysýshylar tizimi arasynda 5 qazaqstandyq sportshy bar.