Sanat Kóshkimbaevtiń Qazaqstan men Ortalyq Azııa týraly kitaby shyqty

ASTANA. QazAqparat - Elordada halyqaralyq qatynastar salasynyń belgili mamany, saıası ǵylymdarynyń doktory Sanat Kóshkimbaevtiń «Kazahstan ı Tsentralnaıa Azııa mejdý vyzovamı ız proshlogo ı grıadýşego» atty kitaby tanystyryldy, dep habarlaıdy QazAqparat tilshisi.

Іs-sharaǵa tanymal saıasattanýshylar, dıplomattar, ǵalymdar, tanymal sarapshylar qatysty. Bul jınaqtyń tanystyrylymy QR Prezıdenti janyndaǵy Qazaqstannyń strategııalyq zertteýler ınstıtýtynyń 30 jyldyǵyna arnalyp otyr.

Atalǵan ınstıtýt dırektorynyń orynbasary, kitap avtory Sanat Kóshkimbaev elimizdiń syrtqy saıasaty baǵdaryn qalyptastyrýǵa, jahandyq ári aımaqtyq qaýipsizdik máselelerine eleýli úles qosty. Bul kitapta aımaqtyń evolıýtsııasy jazylyp, negizgi syn-qaterler men táýekelderge taldaý júrgizilgen. Sonymen qatar, onda ár jyldary avtordyń otandyq jáne sheteldik basylymdarda jarııalanǵan maqalalary, baıandamalary men suhbattary jınaqtalǵan.

QR Prezıdenti janyndaǵy Qazaqstannyń strategııalyq zertteýler ınstıtýtynyń dırektory Erkin Tuqymov búgingi tanystyrylym barysynda osy kitap Sanat Kóshkimbaevtyń kóp jylǵy eńbeginiń jemisi ekenin atap ótti.

Onyń aıtýynsha, búgingi tańda kitapta qamtylǵan zertteýler óte mańyzdy. Onyń arqasynda Ortalyq Azııa óńiriniń ishki protsesterin tarıhı jáne saıası aspektide jaqsyraq túsinýge bolady.

«Halyqaralyq turaqsyzdyqtyń shıelenisýi jaǵdaıynda óńirlik yntymaqtastyqtyń mańyzdylyǵy artyp keledi. Ortalyq Azııa qaıtadan úlken halyqaralyq saıasattyń nazaryna iligip otyr. Qazir Shyǵys, Ońtústik Azııa men Batysty baılanystyratyn kópirge aınaldy. Instıtýt sarapshylary retinde óńirdegi zertteýlerge erekshe mán beremiz. Bizdiń sarapshylar óz deńgeıinde yntymaqtastyq taqyryptaryn tabysty túrde ilgeriletip keledi. Qazaqstannyń strategııalyq zertteýler ınstıtýty Ortalyq Azııadaǵy sarapshylarmen turaqty kezdesý ótkizetin dástúrli alańǵa aınaldy», - dedi E. Tuqymov.