Sanat Kóshkimbaev: Jastar saıasaty - memlekettik damý strategııasyndaǵy basymdyqtyń biri

ASTANA. QazAqparat - Qazaqstan Prezıdenti Nursultan Nazarbaev elimizdegi jastardyń máselesin sheshý úshin qarapaıym jáne aıqyn quraldarǵa súıenýdi usynyp otyr. QR Prezıdenti janyndaǵy QSZI dırektorynyń orynbasary Canat Kóshkimbaev Jastar jylyna bastalýyna qatysty osyndaı pikir bildirdi, dep habarlaıdy QazAqparat.

«Elbasynyń Jastar jylynyń ashylýynda aıtqan sózinde jastar salasy men saıasatynda paıda bolatyn tektonıkalyq úrdister tereń jáne egjeı-tegjeıli taldanyp kórsetilgen. Jastar qoǵamnyń belsendi, izdenýshi, demografııalyq mobıldi bóligi bolyp tabylady. Sonymen birge, áleýmettik osal jáne kóbinese túrli baǵyttaǵy trendtterdiń yqpalyna ushyraıdy. Sondyqtan, jastar saıasaty jalpy memlekettik damý strategııasynyń basty basymdyqtarynyń biri. Basqasha aıtqanda, asyra silteýsiz, jastar - eldiń bolashaǵy», - deıdi Sanat Kóshkimbaev.

Sarapshynyń aıtýyna qaraǵanda, erteńgi kúnin, bolashaǵyn oılaıtyn saıasatker kún tártibindegi jastardyń ózekti máselelerin jaqsy túsinedi. ıAǵnı, Elbasy sóziniń basty baǵdary - júıeli sharalardy retimen júzege asyrý arqyly kórinis tapqan memlekettiń jastarǵa qamqorlyǵy men qoldaýy.

«Óz kezeginde Prezıdenttiń oılary kásiptik bilim berý jáne jumyspen qamtý, turǵyn úı jáne otbasy, densaýlyq saqtaý jáne demalys ýaqytyn ótkizý, tárbıe berý jáne otansúıgishtikke baılanysty ózekti máselelerge baǵyttalǵan. Prezıdent atalǵan máselelerdi sheshýde qarapaıym jáne aıqyn quraldarǵa súıenýdi usynady», - deıdi ol.

Canat Kóshkimbaev iri qalalarda jas otbasylarǵa arnalǵan jalǵa beriletin turǵyn úı baǵdarlamalarynyń sheńberinde jylyna keminde bir myń páter salynatyn eske saldy.

««7-20-25» baǵdarlamasy qazirdiń ózinde iske qosylǵan. «Jas kásipker», «Dıplommen aýylǵa», «Bastaý», «Aýyl - El Besigi» jobalary, «Bıznes-2020» jol kartasy jastar bıznesin damytýǵa jáne jumyspen qamtylý deńgeıin arttyrýǵa baǵyttalǵan. Bilim berýdiń qoljetimdiligin arttyrý úshin qosymsha 20 myń grant bólinip, 75 myń orynǵa arnalǵan jańa stýdenttik jataqhanalardyń qurylysy bastaldy. Qashyqtan oqytý salasy usynylǵan «Open University - Ashyq ýnıversıtet» mysalynda keńeıtiletin bolady. Jalpy, elimizde jańartylǵan baǵdarlamalar boıynsha 20 ýnıversıtet jáne 180 kolledj jumys isteıtin bolady. Osynyń bári de jastar úshin atqarylyp jatqan sharýalar», - deıdi sarapshy.

Eske sala ketsek, kúni keshe Prezıdenttiń qatysýymen Qazaqstanda Jastar jyly resmı túrde bastalǵan bolatyn. Memleket basshysy Astanada uıymdastyrylǵan «Táýelsizdik urpaqtary» atty saltanatty sharada jas mamandar men otbasylardy qoldaýǵa qatysty birqatar tapsyrmalardy júktegen edi.