Sanaq.gov.kz arqyly ıntervıýerdiń kim ekenin bilýge bolady

ASTANA. KAZINFORM — Aýyl sharýashylyǵy ıntervıýerlerin sanaq.gov.kz saıty nemese 1446 nómiri arqyly tekserýge bolady. Bul týraly Ulttyq statıstıka bıýrosy málim etti. 

Qazaqstanda aýyl sharýashylyǵy sanaǵynyń eń aýqymdy — ekinshi kezeńi jalǵasyp jatyr. Elimiz boıynsha 2,5 myńnan astam Ulttyq statıstıka bıýrosynyń ıntervıýeri eldi mekenderdi aralap, agrarlyq salaǵa qatysty derekterdi jınap jatyr.

Intervıýerlerdi arnaıy kógildir tústi formasynan jáne beıdji bar qyzmettik kýáliginen ońaı tanýǵa bolady. Beıdjde ornalasqan QR kod arqyly qyzmetkerdiń jeke basyn birden tekserýge múmkindik bar.

Sonymen qatar ıntervıýerdiń kýálik nómirin sanaq.gov.kz saıtyndaǵy «Intervıýerdi izdeý» bóliminde engizý arqyly nemese 1446 biryńǵaı baılanys ortalyǵyna qońyraý shalyp, aqparatty naqtylaýǵa bolady.

— Eger ıntervıýer kelgen kezde úıde eshkim bolmasa, ol baılanys derekteri kórsetilgen habarlama qaldyrady. Mamandardyń belgilengen mekenjaıǵa barý faktisi GPS júıesi arqyly tirkeledi. Jalpy, ıntervıýerlerdiń jumysy turaqty baqylaýda. Árqaısysyna saýalnamany durys júrgizýdi qadaǵalaıtyn nusqaýshylar bekitilgen. Sondaı-aq óńirlerge Ulttyq statıstıka bıýrosynyń jumys tobynyń músheleri shyǵyp, sanaqtyń júrgizilý tártibi men jınalǵan derekterdiń obektıvtiligin tekseredi. Kún saıyn derekterdiń sapasy baqylaýdan ótedi, munda qatelikter anyqtalsa, mysaly, respondenttiń mekenjaıy durys engizilmese nemese kórsetkishter kúmándi bolsa, túzetýler jasalady, — dep jazdy statbıýrodan.

Ulttyq statıstıka bıýrosy barlyq jaýaptardyń qupııa saqtalatynyn jáne tek resmı statıstıkany qalyptastyrý úshin ǵana paıdalanylatynyn eske salady.

Aýyl sharýashylyǵy sanaǵynyń oflaın kezeńi 20 qazanǵa deıin jalǵasady.

Aıta keteıik, aýyl sharýashylyǵy sanaǵyna onlaın 390 myń respondent qatysty.