Sanany jańǵyrtý barsha túrki álemine ortaq mindet - TÚRKSOI

ASTANA. QazAqparat - Túrki mádenıeti men ónerin damytý xalyqaralyq uıymy - TÚRKSOI-da QR Prezıdenti Nursultan Nazarbaevtyń "Bolashaqqa baǵdar: rýxanı jańǵyrý" maqalasyna arnalǵan konferentsııa ótti. Túrkııa ǵalymdary atalǵan maqaladaǵy tezısterdiń barsha túrki xalyqtaryna ortaq ekenin ǵylymı turǵyda dáleldep shyqpaqshy, dep xabarlaıdy QazAqparat tilshisi.

"Atalǵan maqala tek Qazaqstan úshin ǵana ózekti bolyp otyrǵan joq. Ol barsha túrki álemine arnalǵan joldaý ispetti, jol nusqaýshy sııaqty. Búginde TÚRKSOI-da biz ózimizdiń mádenı muramyzdy barynsha saqtap, keler urpaqqa jetkizýge tyrysyp kelemiz. Negizgi maqsat - ulttyq bolmysymyzdy saqtaý, ortaq qundylyqtarǵa qurmetpen qaraý. Sol sebepti Nursultan Nazarbaevtyń maqalasyn túrki álemin damytýdyń jol kartasy dep, ıdeıalardyń qaınar kózi retinde qaraýymyz qajet", - deıdi uıymnyń Bas xatshysy Dúısen Qaseıinov. Qazaqstannyń Túrkııadaǵy elshisi Abzal Saparbekuly da osy máselege basa nazar aýdaryp, onda kórsetilgen maqsat-mindetter túrki áleminiń sanasyn jańǵyrtýǵa óz septigin tıgizetinine senim bildirdi.

Al professor Ahmet Bıdjan Erdjılesýn Nursultan Nazarbaevtyń tezısteri negizinde zertteý jasap, sanany jańǵyrtý máselesiniń barsha túrki álemine ortaq ekenin tarıxı turǵyda dáleldep shyqpaqshy. Ǵalymnyń aıtýynsha, Qazaqstan Prezıdenti Nursultan Nazarbaevtyń oı-ıdeıalary ǵulama Ysmaıyl Ǵaspyráliniń "Birlik - tilde, ortaq oı men árekette" degen sózimen úndesip otyr. "Nursultan Ábishuly sanany jańǵyrtý protsesi árbir xalyqtyń ulttyq kody arqyly júzege asady dep oryndy aıtyp otyr. Men ózim "Bolashaqqa baǵdar: rýxanı jańǵyrý" maqalasyn ǵylymı turǵyda zerttep, onyń tarıxı fýndamentin ázirleýge daıynmyn", - dep atap kórsetti professor Erdjılesýn.

Aıta keteıik, konferentsııa jumysyna TÚRKSOI-dyń Bas xatshysy Dúısen Qaseıinov, Qazaqstannyń Túrkııadaǵy elshisi Abzal Saparbekuly, Atatúrik atyndaǵy tarıx, til men mádenıet jónindegi Joǵarǵy keńestiń prezıdenti, professor Derıa Ors, túrki tili ınstıtýtynyń basshysy, professor Mustafa S. Kachalın, Túrkııanyń tarıx qaýymdastyǵynyń prezıdenti Refık Turan, osy eldiń ýnıversıtet rektorlary men oqytýshylary qatysty. Shara barysynda ǵylym, óner men mádenıet salasynda túrki álemine qosqan úlesi úshin birqatar azamattar  "TÚRKSOI-dyń 25 jyldyǵy" medalimen marapattaldy. Bul nagrada túrki xalyqtarynyń oıshyly, aqyn ıÝsýf Has Hadjıb Balasaǵunnyń atymen shyǵaryldy.