«Sanany arbaǵan serıaldarǵa tosqaýyl qoıý kerek pe?» - respýblıkalyq basylymdarǵa sholý
***
«Elbasy Nursultan Nazarbaev Jambyl oblysyna jumys saparynyń ekinshi kúni aımaqtardy damytý týraly keńes ótkizdi. Óńir ekonomıkasyn órkendetýge baılanysty ózekti máselelerdi talqylaıtyn mundaı keńester aldaǵy ýaqytta basqa oblystarda da ótetin bolady», - dep jazady «Egemen Qazaqstan» gazeti senbilik sanyndaǵy «Óńirlerdiń órkendi órisi ekonomıkadaǵy keleshegi zor salalardyń damýymen baılanysty» degen taqyryptaǵy maqalasynda. Basylymnyń atap ótýinshe, keńes tizginin qolyna alǵan Prezıdent el ekonomıkasyn órkendetý jolynda úlken-úlken kóptegen baǵdarlamalardyń júzege asyrylyp jatqanyn jáne solardyń ishindegi eń negizgisi ındýstrııalandyrý ekenine toqtaldy. Osy oraıda Prezıdent eldiń tabıǵı baılyǵy asa kóp bolǵanymen, bir ǵana shıkizatpen ozyq elderdiń ekonomıkalyq tabystarymen básekelestikke túse almaıtynymyzdy taǵy nazarǵa saldy.
«Egemen Qazaqstan» gazetiniń jazýynsha, «Nur Otan» halyqtyq-demokratııalyq partııasy Qyrǵyzstandaǵy qazaqtar qaýymdastyǵy ókilderine kitaptar men ulttyq mádenıet buıymdaryn jóneltý jóninde aktsııa ótkizdi. Osy jolǵy aktsııa aıasynda partııa atynan Qyrǵyzstandaǵy qazaq dıasporasy ókilderine mýzykalyq aspaptar - qobyzdar, dombyralar, sonymen qatar, kitaptar men ulttyq kıimder joldandy. Materıaldardy tabys etý aıasynda partııa hatshysy Erlan Qarınniń Qyrǵyzstandaǵy qazaqtar qaýymdastyǵynyń tóraǵasy Serikqul Qosaqovpen jáne Bishkek qalasynda turyp jatqan basqa da otandastarymyzben kezdesýi ótti.
***
Keshe Astanada TMD-ǵa múshe memleket arasyndaǵy «Kitap óneri» IX Halyqaralyq baıqaýynyń ádil qazylar alqasy óz jumysyn aıaqtady. Qazaq jerinde alǵash ret bas qosqan Baspa isi, polıgrafııa, kitap shyǵarý men taratý jónindegi Memleketaralyq keńestiń músheleri eki kún boıy TMD-nyń eń úzdik kitabyn anyqtady. Osy joly baıqaýdyń bas júldesin Qazaqstan men Belarýs elderi ózara bólisti. Degenmen, 1 mln. rýbl (shamamen 5 mln. teńge) kólemindegi syıaqy jeńimpazdyń ekeýine de berilýi tıis. Bul týrasynda «Alash aınasy» gazetiniń búgingi sanyndaǵy «Memlekettik rámizder 5 mln. teńgege «baǵalandy» degen taqyryptaǵy maqalada keńinen baıandalǵan.
***
«Qyzylorda oblysyndaǵy Qyzyljarma aýyldyq okrýginiń ákimi Temirbolat Ermahanov sybaılas jemqorlyqpen kúres týraly mýltfılm túsirip, aıdy aspanǵa bir-aq shyǵardy», - dep jazady «Aıqyn» gazeti senbilik nómirindegi «Aýyl ákimi mýltfılm túsirdi» degen taqyryptaǵy maqalasynda. Mýltfılmde bir paraqordyń tirligi ázil-shyny aralas oqıǵalar negizinde sýretteledi. «Qunyqqannan dánikken jaman» degendeı, oqıǵa mýltfılmniń bas keıipkeri - paraqor sheneýniktiń aqyr sońy túrmege túsýimen aıaqtalady. Mundaǵy maqsatymyz - paraqorlyq pen sybaılas jemqorlyqtyń jolyna tosqaýyl qoıý», - dedi T.Ermahanov.
***
Ózbekstanda aqpan aıynan bastap birqatar túrik serıaldaryna, al Ázerbaıjanda naýryzdan beri kez kelgen teleserıaldary men fılmderin kórsetýge tyıym salynypty. Tájikstan úkimeti de taıaýda otandyq telearnalarynda teris tárbıe beredi degen sebeppen túrik serıaldaryn kórsetýden bas tartypty. Al bizde she? Kerisinshe kúnine birneshe túrik serıaldaryn telearnalar jarysa kórsetip jatady. Osy rette «Astana aqshamy» birqatar mamandardyń pikirin bilgen eken. Maqala «Sanany arbaǵan serıaldarǵa tosqaýyl qoıý kerek pe?» degen taqyryppen berilgen.
