Sanaly ǵumyryn azattyq jolyna arnaǵan qarymdy qalamger, qaıratker tulǵa - Hasan Oraltaı dúnıeden ozdy
ASTANA. Sáýirdiń 14-i. QazAqparat - Búgin Germanııanyń Mıýnhen shaharynda qarymdy qalamger, sanaly ǵumyryn azattyq jolyna arnaǵan qaıratker tulǵa - Hasan Oraltaı dúnıeden ozdy, dep habarlaıdy QazAqparat.
Hasan Oraltaı 1933 jyly Altaıda, Erenqabyrǵa taýynyń bókterinde dúnıege kelgen.
At jalyn tartyp mingen bala jastan el isine aralasqan Hasan Oraltaı 1946 jyly ákesi Qalıbek Hakim bastaǵan kóshpen Gomından ókimetinen qashyp, Gımalaı asady. 1951-1954 jyldary arasynda Úndistannyń Kashmır ólkesinde turǵan olar 1954 jyly Túrkııaǵa keledi. Baýyrlas eldiń Salıhlı degen qalasyna qonys tepken Oraltaı munda ulttyq qozǵalystarǵa aralasa bastaıdy. Túrkııada Mustafa Shoqaıdyń shákirtterimen jolyǵyp, Qarys Qanatbaı basshylyq jasaıtyn Túrkistan ulttyq komıtetimen tyǵyz baılanysta bolady. Ulttyq baǵyttaǵy «Túrk eli» jýrnalynyń shyǵýyna atsalysady. Ózi de kóptegen maqalalar jazyp, «Túrikshil aqyn Maǵjan Jumabaıuly», «Shyǵys Túrkistan túrikteri azattyq jolynda», «Alash - qazaq túrikteriniń ulttyq urany», «Túrikshe-qazaqsha sózdik» sııaqty kitaptar shyǵarady.
Saıası tańdaýyn jasaǵan Hasan Oraltaı 1968 jyldan 1995 jylǵa deıin «Azattyq» radıosynda jumys isteıdi. Halyqaralyq radıoda qyzmette júrip Keńester odaǵynda júzege asyrylyp jatqan ulttar saıasatynyń solaqaı tustaryn áshkereleıtin kóptegen baǵdarlamalar jasaıdy.
Alashtyń azattyǵyn armandaǵan Hasan Oraltaı Qazaqstannyń táýelsizdigin erekshe qýanyshpen qarsy aldy. Ol Qazaqstan Jazýshylar odaǵynyń halyqaralyq «Alash» syılyǵynyń jáne Qazaqstan Jýrnalıstıka akademııasynyń «Altyn samuryq» syılyǵynyń ıegeri. Suryptalǵan 450 tomnan turatyn qundy kitaptary men qoljazbalaryn Qazaqstan Ulttyq akademııalyq kitaphanasynyń qoryna tapsyrǵan.
Tabandy tulǵa, qajymas kúresker, qarymdy qalamger Hasan Oraltaıdyń ótken ómiri men kúres joly óziniń «Elimaı-lap ótken ómir» atty ǵumyrnamalyq kitabynda baıandalǵan.
