Sanaq: 300 myńnan astam sharýashylyqtyń mekenjaıy naqtylandy

ASTANA. KAZINFORM – Aýyl sharýashylyǵy sanaǵyna daıyndyq sharalary sheńberinde úı sharýashylyqtaryn aldyn ala aralaý (lıstıng) kezeńi aıaqtaldy. Bul týraly Ulttyq statıstıka bıýrosy málim etti. 

Stat bıýronyń dereginshe, respýblıka boıynsha bir aı ishinde 70 qalada tıisti jumystar júrgizilgen. Osy ýaqyt ishinde Ulttyq statıstıka bıýrosynyń ıntervıýerleri 300 myńnan astam úıdi aralap, sharýashylyqpen aınalysatyndardyń mekenjaıyn naqtylady.

Lıstıng kezeńiniń sońǵy jumystarynyń barysymen Saryaǵash qalasyna barǵan Bıýro basshysy Maqsat Turlybaev tanysyp qaıtty. Sapar aıasynda ol ıntervıýerlermen birge úı-úıdi aralaýǵa qatysty.

— Aýyl sharýashylyǵy sanaǵy — agrarlyq saladaǵy bıylǵy jyldyń negizgi oqıǵasynyń biri. Kóptegen turǵynnyń aldaǵy shara týraly habardar ekenine kóz jetkizdim. Estimegenderine sanaqtyń sala bolashaǵy úshin mańyzdylyǵyn aıtyp túsindirdim. Barshańyzdy aldaǵy sharada belsendilik tanytýǵa shaqyramyn, — dep atap ótti ol.

Lıstıng barysynda jumys tobynyń músheleri barlyq oblysqa baryp, jergilikti jerlerde dalalyq jumystardyń uıymdastyrylýyn, tehnıkalyq quraldardyń daıyndyǵyn, sondaı-aq ıntervıýerlerdiń daıyndyq deńgeıin tekserdi.

Esterińizge sala keteıik, aýyl sharýashylyǵy sanaǵy 2025 jylǵy 1 tamyz ben 20 qazan aralyǵynda ótedi jáne eki kezeńnen turady. 1-31 tamyz aralyǵynda onlaın-kezeń ótedi, oǵan egin jáne mal sharýashylyǵymen aınalysatyn zańdy tulǵalar, sharýa qojalyqtary, fermerler jáne úı sharýashylyqtary qatysýy tıis. Oflaın kezeńde ıntervıýerler onlaın suraýdan ótpegen, baý-baqsha ósiretin nemese mal ustaıtyn úılerdi aralaıdy. Bul jumys 2025 jylǵy 20 qyrkúıekten 20 qazanǵa deıin júrgiziledi.

Buǵan deıin habarlanǵandaı, aýyl sharýashylyǵy sanaǵyn ótkizýge 3,7 mlrd teńge qarjy jumsalady.