Sán jáne densaýlyq: Kartoptyń biz bilmeıtin qasıetteri
ASTANA. QazAqparat - Kartop - arzan ári qoljetimdi kókónisterdiń biri. Arzan bolǵanymen onyń qabyǵynyń astynda paıdaly zattar kóp ekenin de bilip júreıik. Qarapaıym kartopty úı jaǵdaıynda kosmetıkalyq qural retinde paıdalanýdyń joldaryn usynamyz, dep jazady massaget.kz.
Kóz
Qııar kesekterin qoıý arqyly kóz isinýin ketirýge bolatynyn bilemiz. Kartopty da sol maqsatta paıdalanýǵa bolady. Kartopty jińishke etip týrańyz nemese úkkishten ótkizip, dákege salyp, kózde 10-15 mınýt shamasynda ustańyz. Ýaqyt ótken soń betińizdi jyly sýmen jýyp tastańyz.
Teri
Terige bezeý shyǵyp ketse, ony úsh kún qatarynan kartop syǵyndysymen súrtińiz. Kartop sýy kúnge qatty kúıgen teriniń ashyǵanyn basýǵa da kómektesedi. Kartopty qaınatqan sýdy sýytyp, ony bet jýýǵa arnalǵan tonık retinde qoldanýǵa bolady. Mundaı tonıkti tońazytqyshqa qoıý qajet jáne 2-3 kúnnen artyq saqtaýǵa bolmaıdy.
Shash
Eger shash túsin qaraıtqyńyz kelse, kartop qabyǵynan suıyqtyq daıyndap, shashyńyzdy sonymen shaıyńyz. Jýylǵan iri kartoptyń qabyǵyn jáne bir anar qabyǵyn ydysqa salyńyz. Qabyqty batatyndaı etip sý quıyńyz. Qaınatyńyz, odan soń sýytyńyz. Sýyn súzip alyp, shashyńyzdy sýsabynmen jýyp bolǵannan keıin, jańaǵy suıyqtyqpen shaıyńyz. Nátıjesinde shashyńyz tabıǵı túsine qaraǵanda azdap qaraıǵanyn baıqaısyz.
Shaǵý jáne kúıik
Kartop jándik shaqqanda nemese kishigirim kúıikten paıda bolatyn aýrýdy basýǵa kómektesedi. Shıki kartop kesindisin aýyryp turǵan jerge 5 mınýtqa basyńyz.
Esińizde bolsyn, eger terini kúıdirip alsańyz, zaqymdanǵan jerdi aldymen salqyndatý kerek. Kúıgen jerdi krannan aqqan óte sýyq sýǵa ustańyz nemese 10 mınýt shamasynda muz basyńyz. Sýyqtyń taraý jyldamdyǵy jylýdyń taraý jyldamdyǵynan az. Sondyqtan 1 sekýndta kúıdirip alǵan jerińizdi 10 mınýt salqyndatý qajet. Kúıgen jerge túrli maı men krem qoldanýdyń qajeti joq.
Sharshaǵan jaǵdaıda
Kartop qaınatqan sýdy bólme temperatýrasynda sýytyp alyńyz. Sodan soń sýyǵan sýdy legenge quıyp alyp, sharshap turǵan aıaǵyńyzdy 20 mınýt shamasynda malyp jatyńyz. Sonymen qatar kartop qaınaǵan sýda bolatyn krahmal aıaq jaralarynyń tez jazylýyna da kómektesedi.
