San-Sebastıan turǵyndary 2030 jylǵy álem chempıonatyn óz qalasynda ótkizýge qarsy shyqty
ASTANA. KAZINFORM - Álemdik fýtbol tarıhynda alǵash ret qala turǵyndary álem chempıonatynyń matchtaryn ótkizýden óz erkimen bas tartýy múmkin.
Euro-pulse.ru aqparattyq portalynyń málimetinshe, San-Sebastıannyń qoǵamdyq uıymdary FIFA-ǵa óz qalasynyń 2030 jylǵy álem chempıonatyn ótkizýshiler tizimine qosylýyna qarsylyq bildirgen.
San-Sebastıan álem chempıonatyn qabyldaıtyn Ispanııanyń 11 qalasynyń qataryna qosylǵanymen, jergilikti halyq onyń keri áseri bolýy múmkin dep alańdap otyr. Narazylyqtyń basty sebebi – overtýrızm máselesiniń shıelenisýi.
Belsendiler keıingi 9 jylda týrıster aǵyny 80 paıyzǵa derlik óskenin atap ótti. Turǵyndar qalanyń qaıtalanbas bolmysynan aıyrylyp bara jatqanyn aıtyp, dabyl qaǵýda.
Qala ákimdigi turǵyndardyń alańdaýshylyǵyna nazar aýdarmaı, chempıonatty ótkizýdiń artyqshylyǵy kóp ekenin alǵa tartqan. Ásirese qalanyń ekonomıkalyq paıdasy men halyqaralyq bedeliniń artatynyn aıtty.
Endi San-Sebastıannyń 2030 jylǵy álem chempıonatyn qabyldaıtyn qala retindegi taǵdyry chempıonattyń uıymdastyrý komıtetine baılanysty bolady.
Eske sala keteıik, 2030 jylǵy fýtboldan álem chempıonatyna 64 qurama qatysýy múmkin.