Sán-saltanat salyǵy qozǵaltqysh kólemi emes, kóliktiń qunyna qaraı salynady - mınıstr

ASTANA. QazAqparat – Ulttyq ekonomıka mınıstri Álibek Qýantyrov sán-saltanat salyǵy qymbat avtokólik qozǵaltqyshynyń kólemine emes, avtomobıl qunyna qaraı salynatynyn aıtty, dep habarlaıdy QazAqparat tilshisi.

Qozǵaltqyshtyń kólemine qatysty sán-saltanat salyǵyn qarastyryp otyrǵan joqpyz. Negizinde, bizde qazir qandaı da bir túrde sán-saltanatqa salynatyn salyq bar. Qozǵaltqysh kólemi úlken bolsa, progressıvti shkala eskerilgen, ıaǵnı onyń kólemi úsh lıtrden asqanda, kólikke qatysty tıisti salyq bar. Al, sán-saltanat salyǵyn engizý aıasynda biz kólik qunyna qaraımyz. Mysaly, kólik quny 200 myń dollar bolsa, onda bastapqy jarna kezinde bir rettik tólem nemese jyl saıynǵy tólem bolýy múmkin. Sondyqtan, kólik qozǵaltqyshynyń kólemine qaraı esepteý bolmaıdy degen oıdamyn, -

dedi Á. Qýantyrov Senat otyrysynan keıin tilshiler suraǵyna jaýap bere otyryp.

Osy oraıda, ol bul baǵyttaǵy naqty málimetter 2023 jyly belgili bolatynyn aıtty.

«Sán-saltanat salyǵyn talqylaý endi ǵana bastaldy. 2023 jyldyń birinshi toqsanynda talqylaýlardyń negizgi kezeńi bolady. Biz qazir damyǵan elderdiń halyqaralyq tájirıbesin zerttep jatyrmyz», - dedi mınıstr.

Budan buryn habarlanǵandaı, 2024 jyldan bastap sán-saltanat salyǵy týraly norma kúshine enedi.