Sán-saltanat salyǵynyń ornyna qandaı alym túri engiziledi — Jumanǵarın jaýaby

ASTANA. KAZINFORM — Premer-mınıstrdiń orynbasary — Ulttyq ekonomıka mınıstri Serik Jumanǵarın sán-saltanat salynyǵynyń ornyna nelikten jańa alym engiziletinin túsindirdi.

Búgin Aqordada BAQ ókilderi vıtse-premerden: «Serik Maqashuly, vedomstvońyz sán-saltanat salyǵyn engizýden aınyp, al siz nelikten alkogol, jyljymaıtyn múlik, kólik syndy jekelegen taýarǵa salyq salýǵa sheshim qabyldadyńyz?» — dep suraǵan edi,.

Osy oraıda vıtse-premer sán-saltanattyń ne ekendigin saýatty túrde anyqtap alý kerektigin basa aıtty.

— Eger sizdiń barlyq jyljymaıtyn múlkińizdiń jalpy somasy 450 mln-nan assa, onda qatelespesem bazalyq mólsherleme jylyna 3 mln teńge bolady, buǵan qosa artyq somaǵa 2 paıyz bar. Odan keıin, eger mashına 75 mln teńge bolsa, sondaı-aq qymbat alkogolge, qymbat sıgaraǵa joǵary mólsherleme tóleısiń. Sizdiń oıyńyzsha, basqa ne sán-saltanat bolmaq. Men tipti bilmeımin de, — dedi ol.

Serik Jumanǵarın sán-saltanatqa qatysty naqty túsinik bolmaǵan jaǵdaıda kinásiz adamdar zardap shegýi múmkin ekendigin atap óte kele, bul sóziniń asyra silteýshilik ekendigin de jasyrǵan joq.

— Árıne, men asyra siltep otyrmyn. Bul jerde kináli ne kinásiz joq. Degenmen, bireýlerge teris salyq salyný múmkin, — dedi vıtse-premer.

Buǵan deıin Ulttyq ekonomıka mınıstriniń birinshi orynbasary Azamat Ámrın Senatta ótken dóńgelek ústelden keıin ótken baspasóz máslıhatynda Májiliste jatqan Salyq kodeksiniń jańa redaktsııasynda sán-saltanat salyǵy qalaı esepteletinin aıtqan edi.