Sán-saltanat salyǵy baılyqqa emes, asyra baılyqqa salynady – vıtse-premer

Premer-Mınıstrdiń orynbasary – Qarjy mınıstri Erulan Jamaýbaev sán-saltanat salyǵyn engizý baǵytynda qandaı jumys júrgizilip jatqanyn aıtty, dep habarlaıdy Kazinform agenttigi.

«Tıisti jumys toby bar. Onda júzdegen otyrys ótkizdik. Oǵan baılardy shaqyryp, pikirin eshkim suraǵan joq. Sebebi, memlekettik organdardyń, bıznestiń, «Atameken» UKP ókilderi men depýtattar jáne basqa da sarapshylardy shaqyryp, talqylaý júrgizemiz. Ulttyq ekonomıka mınıstrliginiń janynda ekonomıkalyq zertteýler ınstıtýty bar. Osy ınstıtýtta búkil másele talqylanyp jatyr. Baılyq degen jaman motıvatsııa emes. Ár adam, ár kásipker birinshi kezekte jaǵdaıyn jaqsartýǵa kóńil bóledi jáne sol baǵytta jumys isteıdi», - dedi ol Úkimet otyrysynan keıin BAQ ókilderiniń saýalyna oraı.

Sonymen qatar ol salyq baılyqqa emes, asyra baılyqqa salynatynyn atap ótti.

«Salyq kez kelgen baılyqqa salyna bermeıdi. «Roskosh» termıni qazaqsha aýdarǵanda «sán-saltanat» bolady. Biz sony anyqtap alýymyz kerek. Buǵan deıin Ulttyq ekonomıka mınıstri de, vıtse-mınıstr de «salyqty asyra baılyqqa qarastyramyz. Quny óte qymbat ushaqtar, ıahtalar jáne taǵy basqa asyl zattarǵa qarastyrylady» degen bolatyn. Olardyń tizilimi bolady. Tek solarǵa joǵary salyq salynady», - dedi Erulan Jamaýbaev.