San salaly, san ıirimdi "Saǵyndyrǵan ánder-aı" keshi bizge qýat beredi - M.Shahanov
ALMATY. Jeltoqsannyń 25-i. QazAqparat /Erlik Erjanuly/ - Budan myń jyldan astam ýaqyt buryn ǵumyr keshken qazaq topyraǵynyń uly maqtanyshy Ábý Nasyr ál-Farabı babamyz mýzykany adamzatty izgilikke tárbıeleıtin jáne qıratqysh dep ekige bólgen edi.
Búgingi jahandaný kezeńinde qıratqysh mýzyka alǵa shyqty. Ony halyq jazýshysy, aqyn Muhtar Shahanov keshe Almatyda ótken "Saǵyndyrǵan ánder-aı" keshinde aıtty, dep habarlaıdy QazAqparat.
"Maıra Іlııasova uıymdastyryp otyrǵan "Saǵyndyrǵan ánder-aı" keshi bizdiń san ǵasyrlyq baılyǵymyzdy, mýzykalyq rýhanı baılyǵymyzdy alǵa tartyp otyr. Kezinde Gıtlerden shyǵystaǵy jaýlap alǵan elderde qandaı saıasat qoldanamyz dep suraǵanda olarǵa erteden keshke deıin jeńil mýzyka oınatyp, oılanýǵa, kitap oqýǵa múmkindik bermeý kerek. Óıtkeni rýhanı jaǵynan taıaz adam ózin baqytty sezinedi degen eken. Mine, sol Gıtlerdiń aıtqany artyǵymen iske asty. Qazir búkil álemdi qıratqysh mýzyka jaýlap aldy. Sondyqtan san salaly, san ıirimdi "Saǵyndyrǵan ánder-aı" keshi shynynda bizge jańa qýat beredi", deıdi "Nobel" syılyǵy laýreattary men nobelshilerdiń halyqaralyq kongresinde "Nobeldiń Altyn medaliniń" ıegeri atanǵan kórnekti mádenıet jáne qoǵam qaıratkeri Muhtar Shahanov.
