San-Frantsıskoda blekaýt: qalanyń úshten biri jaryqsyz qaldy

ASTANA. KAZINFORM — AQSh-tyń San-Frantsısko qalasynda keshe keshkisin aýqymdy elektr qýatynyń óshýi tirkelip, sonyń saldarynan qalanyń shamamen úshten biri jaryqsyz qaldy, dep habarlaıdy  Anadolu Ajansı.

Apat saldarynan shamamen 130 myń turǵyn úı men kásiporyn elektr energııasynsyz qaldy, kóptegen kvartaldar tolyqtaı qarańǵylyqqa bólendi.

Elektrmen jabdyqtaýdaǵy úzilisterge baılanysty birqatar meıramhana men dúkender jumysyn ýaqytsha toqtatýǵa májbúr boldy. Sondaı-aq qoǵamdyq kóliktiń qozǵalysynda irkilister týyndap, keıbir stantsııalarda qyzmet kórsetý ýaqytsha toqtatyldy.

San-Frantsıskonyń tótenshe jaǵdaılardy basqarý departamenti qala boıynsha kólik qatynasynda qıyndyqtar bar ekenin habarlap, turǵyndarǵa qajetsiz saparlardan bas tartýdy usyndy.

Buǵan deıin Domınıkan Respýblıkasynda da aýqymdy elektr qýatynyń óshýi tirkelip, ol el astanasy Santo-Domıngony, Pýnta-Kana kýrortyn jáne ózge de óńirlerdi qamtyǵany habarlanǵan bolatyn.